Azərbaycan.media xəbər verir ki, “British Airways” aviaşirkəti uçuş biletlərinin qiymətlərində artım tətbiq edəcəyini açıqlayıb.
Məlumata görə, qərar Hörmüz boğazı ətrafında yaranan gərginlik və bunun nəticəsində neft və yanacaq qiymətlərində müşahidə edilən artımla əlaqələndirilir. Beynəlxalq Hava Yolları Qrupu (IAG) bildirib ki, Yaxın Şərqdəki mövcud vəziyyət reaktiv yanacaq qiymətlərini yüksəldir və bu da aviaşirkətin xərclərinə təsir göstərir.
Şirkət qeyd edib ki, yanacaq xərclərinin artımını müəyyən dərəcədə sığortalama mexanizmləri ilə idarə etsə də, bu dəyişikliklərin sərnişin biletlərinə də təsir etməsi istisna edilmir.
Rəsmi açıqlamada vurğulanıb ki, hazırda yanacaq təchizatında ciddi fasilələr müşahidə olunmasa da, potensial risklər və bazardakı qeyri-sabitlik aviasiya sektorunda qiymət artımlarını gündəmə gətirir.
Böyük Britaniya hökumətinin isə vəziyyəti yaxından izlədiyi və mümkün yanacaq çatışmazlığına qarşı alternativ tədbirlər üzərində çalışdığı bildirilir.
Aviasiya ekspertləri yaxın həftələrdə uçuşların azalması və biletlərin bahalaşması ehtimalının olduğunu istisna etmirlər.
