Azərbaycan.media xəbər verir ki, musiqinin insan sağlamlığı və beyin funksiyalarına təsiri ilə bağlı son illərdə aparılan elmi tədqiqatlar diqqətçəkən nəticələr ortaya qoyub.
Sağalmanı sürətləndirir
2024-cü ildə California Northstate University College of Medicine tədqiqatçıları tərəfindən aparılan araşdırma və meta-analiz göstərib ki, əməliyyatdan sonra musiqi dinləmək xəstələrin hiss etdiyi ağrını əhəmiyyətli dərəcədə azaldır və ürək döyüntüsünü aşağı salır. 35 araşdırmanın nəticələrinə əsasən, musiqi anesteziyadan ayılma mərhələsində stressi azaldır, narahatlıq və kortizol səviyyəsini aşağı salır.
Demensiya riskini azalda bilər
2025-ci ildə Monash University alimləri tərəfindən aparılan araşdırmada müntəzəm musiqi dinləməyin demensiya riskini azaltdığı müəyyən olunub. 70 yaşdan yuxarı 10 min 893 nəfərin iştirak etdiyi tədqiqatın nəticələrinə görə, davamlı musiqi dinləyənlərdə demensiya riski 39 faiz daha az olub. Musiqi aləti çalan şəxslərdə isə bu riskin 35 faiz aşağı olduğu qeyd edilib. Bu nəticələr Demensiya ilə mübarizədə musiqinin potensial rolunu göstərir.
Beyin plastisliyini artırır
Araşdırmalar göstərir ki, musiqi ilə məşğul olmaq beynin yenidən qurulma qabiliyyəti olan Beyin plastisliyini gücləndirir. Harvard Medical School tərəfindən hazırlanaraq “Neuroscientist” jurnalında dərc edilən tədqiqatda erkən yaşlarda musiqi təhsili alan uşaqların idrak qabiliyyətlərinin daha yüksək olduğu bildirilib. Həmçinin musiqi aləti çalan uşaqlarda beynin iki yarımkürəsi arasında əlaqəni təmin edən strukturların daha inkişaf etmiş olduğu müəyyən edilib.
Canlı musiqi daha güclü təsir göstərir
University of Zurich tədqiqatçıları tərəfindən aparılan araşdırma canlı musiqinin beyin üzərində daha güclü təsirə malik olduğunu göstərib. Məlum olub ki, canlı konsert zamanı beynin emosiyalarla bağlı hissəsi olan amigdala daha yüksək və stabil aktivlik nümayiş etdirir. Eyni zamanda emosiyaların emalı ilə bağlı sinir şəbəkəsində də aktivliyin artdığı müşahidə olunub.
Mütəxəssislər hesab edir ki, bu nəticələr musiqinin yalnız əyləncə vasitəsi deyil, həm də sağlamlıq və beyin inkişafı üçün mühüm faktor olduğunu bir daha təsdiqləyir.
