Azərbaycan.media xəbər verir ki, Modern.az-a açıqlama verən yaxın qohumu Pərviz Yəhyalının sözlərinə görə, Milli Onkologiya Mərkəzi-də baş verən partlayış zamanı ağır yaralanan həkim-radioloq Asif Nəsirlinin vəziyyəti ağır olaraq qalır.
Bildirilib ki, o, hazırda həkimlərin nəzarəti altındadır və müalicəsi davam etdirilir.
Xatırladaq ki, hadisə aprelin 30-da baş verib. Belə ki, onkoloji xəstə kimi qeydiyyatda olan 1988-ci il təvəllüdlü Mübariz Sahib oğlu Əliyev tərəfindən partlayıcı vasitə işə salınıb. Nəticədə Mübariz Əliyev aldığı xəsarətlərdən hadisə yerində ölüb, mərkəzin həkimi Asif Nəsirli isə ağır yaralanıb.
Faktla bağlı Yasamal Rayon Prokurorluğu-nda Azərbaycan Respublikası Cinayət Məcəlləsinin 29, 120.2.4 (ümumi təhlükəli üsulla adam öldürməyə cəhd) və 228.1-ci (qanunsuz olaraq partlayıcı maddələr və qurğular əldə etmə, saxlama, daşıma və gəzdirmə) maddələri ilə cinayət işi başlanıb.
Qeyd edək ki, Asif Nəsirli 1999–2005-ci illərdə Azərbaycan Tibb Universiteti-nin Müalicə-profilaktika fakültəsində təhsil alıb. 2005–2006-cı illərdə Milli Onkologiya Mərkəzində internatura, 2006–2008-ci illərdə isə kliniki ordinatura keçib. 2008-ci ildən etibarən mərkəzin Şüa terapiyası şöbəsi və Uşaq klinikasında radiasiya onkoloqu vəzifəsində çalışırdı.
