Azərbaycan.media xəbər verir ki, təqdim olunan bu yazı ilk dəfə olaraq saytımızda yayımlanır.
Azərbaycan Respublikası ilə Latviya Respublikası arasında münasibətlər müasir beynəlxalq sistemdə qarşılıqlı maraqlara əsaslanan əməkdaşlıq modellərindən biri kimi formalaşıb. Bu əlaqələr həm siyasi, həm iqtisadi, həm də təhlükəsizlik sahələrində özünü göstərir və Avropa ilə Cənubi Qafqaz arasında mühüm körpü rolunu oynayır.
Azərbaycan ilə Latviya arasında diplomatik münasibətlər 1994-cü ildə qurulub. Hər iki dövlətin Sovet İttifaqının dağılmasından sonra müstəqillik əldə etdiyinə görə onların xarici siyasət kursunda oxşar prioritetlər var. Bunlar dövlət suverenliyinin möhkəmləndirilməsi, beynəlxalq təşkilatlara inteqrasiya və çoxtərəfli əməkdaşlıqdır. Diplomatik münasibətlərin qurulmasından sonra tərəflər arasında siyasi dialoq intensiv xarakter alaraq, yüksək səviyyəli qarşılıqlı səfərlər təşkil olunub və müxtəlif sahələr üzrə hüquqi baza formalaşıb. Bu proses də ikitərəfli münasibətlərin institusional əsaslarını möhkəmləndirir.
Latviya Avropa İttifaqı və NATO üzvü kimi Azərbaycanın Avropa strukturları ilə əməkdaşlığında mühüm rol oynayır. Azərbaycan üçün Latviya Baltik regionunda etibarlı tərəfdaş olmaqla yanaşı, Avropa bazarlarına çıxış üçün strateji platformadır. Digər tərəfdən, Latviya Azərbaycanı enerji resursları və nəqliyyat-logistika imkanları baxımından önəmli tərəfdaş kimi qiymətləndirir. Xüsusilə enerji təhlükəsizliyi məsələləri Avropa üçün prioritet olduğundan ölkəmizin bu sahədə rolu getdikcə artır. Bu kontekstdə Latviya bizim Avropa enerji bazarına inteqrasiyasına siyasi dəstək verən ölkələrdən biri kimi çıxış edir.
İqtisadi əməkdaşlıq Azərbaycan–Latviya münasibətlərinin əsas istiqamətlərindən biridir. Ticarət dövriyyəsinin artırılması, investisiya mühitinin yaxşılaşdırılması və qarşılıqlı biznes forumların təşkili bu sahədə əsas fəaliyyətlərdəndir.
Nəqliyyat və logistika sahəsində əməkdaşlıq xüsusilə diqqətəlayiqdir. Orta Dəhliz layihəsi çərçivəsində Azərbaycan və Latviya arasında əməkdaşlıq Avropa ilə Asiya arasında yük daşımalarının optimallaşdırılmasına xidmət edir. Latviyanın liman infrastrukturu ilə Azərbaycanın tranzit imkanlarının birləşməsi yeni iqtisadi sinerji yaradır.
Latviya Prezidentinin Azərbaycana səfəri ikitərəfli münasibətlərin inkişafında mühüm mərhələ kimi qiymətləndirmək olar. Səfər çərçivəsində keçirilən görüşlərdə siyasi dialoqun dərinləşdirilməsi, iqtisadi əlaqələrin genişləndirilməsi və regional təhlükəsizlik məsələləri geniş şəkildə müzakirə olundu. Görüşlər zamanı tərəflər enerji təhlükəsizliyi, nəqliyyat marşrutlarının inkişafı və beynəlxalq təşkilatlar çərçivəsində əməkdaşlıq kimi məsələlərə xüsusi diqqət yetirdilər. Əlbəttə ki, bu müzakirələr qarşılıqlı etimadın artmasına və strateji tərəfdaşlığın güclənməsinə xidmət edir.
Səfər çərçivəsində imzalanan sənədlər iqtisadi, logistika, təhsil və innovasiya sahələrini əhatə edir. Bu sənədlər ikitərəfli münasibətlərin hüquqi bazasını daha da möhkəmləndirərək uzunmüddətli əməkdaşlıq üçün zəmin yaradacaq.
Azərbaycan–Latviya münasibətləri qarşılıqlı fayda prinsipinə əsaslanır. Azərbaycan üçün bu əməkdaşlıq Avropa ilə əlaqələrin dərinləşdirilməsi baxımından əhəmiyyətlidir. Latviya üçün isə Azərbaycan Cənubi Qafqaz regionunda strateji tərəfdaşdır. Bu münasibətlər həm də geosiyasi balansın qorunmasına xidmət edir. Avropa İttifaqı ilə Azərbaycan arasında əlaqələrin inkişafında Latviya kimi ölkələrin rolu bizim üçün xüsusi əhəmiyyət kəsb edir.
Nəticə etibarilə, Azərbaycan–Latviya münasibətləri dinamik inkişaf edən və strateji əhəmiyyətə malik əməkdaşlıq modelidir. Latviya Prezidentinin Azərbaycana səfəri və Bakı müzakirələri göstərir ki, bu münasibətlər gələcəkdə daha da genişlənəcək və yeni sahələri əhatə edəcəkdir.
Müəllif: Yalçın Hacızadə – hüquqşünas, politoloq
Mənbə: Azərbaycan.media