Azərbaycan.media xəbər verir ki, bütün dünya İranda etirazçılara qarşı törədilən kütləvi qırğınlardan danışır. Ölkədə baş verən etirazlar zamanı azı 5 min 848 nəfərin həlak olduğu müstəqil insan haqları təşkilatı “Human Rayç” (HRAI) tərəfindən təsdiqlənib. HRAI bildirir ki, bu rəqəm yalnız indiyədək təsdiqlənmiş ölüm hallarını əhatə edir və 17 mindən çox hadisə üzrə hələ də yoxlamalar davam etdirilir.
İranın Səhiyyə Nazirliyindən sızdırılan məlumatlara görə, həlak olanların sayı 30 mindən çoxdur. Britaniyanın məşhur “Tayms” jurnalı isə xəbər verir ki, yalnız xəstəxanalarda qeydə alınmış ölüm hallarının sayı 30 min 304-ə çatıb. Bu məlumatlar İran hakimiyyətinin rəsmi açıqlamaları ilə ciddi ziddiyyət təşkil edir; rəsmi Tehran indiyədək həlak olanların sayını 3 min 117 nəfər kimi açıqlayıb.
BMT-nin İranda insan hüquqları üzrə xüsusi məruzəçisi Mai Sato isə bildirib ki, real ölüm sayı 20 mindən çox ola bilər və mövcud rəqəmlər yalnız bir hissəsini əks etdirir. Analitiklər və insan haqları müdafiəçiləri İran rejiminin etirazları yatırmaq üçün sərt və qəddar üsullardan istifadə etdiyini vurğulayırlar.
Professor və əməkdar jurnalist Qulu Məhərrəmli Azərbaycan.media-ya açıqlamasında qeyd edib ki, bu faciə İranda siyasi hakimiyyətin vətəndaş hüquqlarına hörmətsizliyinin bariz nümunəsidir. Onun sözlərinə görə, beynəlxalq ictimaiyyətin diqqəti və sanksiyalar yalnız kağız üzərində qalmamalı, real təsir göstərməlidir. “İranın qəddar molla rejiminin iç üzü budur. İnsan həyatına qiymət verməyən bir hakimiyyətin qanunsuz zorakılıqları ilə üz-üzəyik,” – deyə Q.Məhərrəmli bildirib.
Ekspertlər əlavə edirlər ki, İran vətəndaşlarının hüquqlarının qorunması və etirazların sülh yolu ilə həll edilməsi üçün beynəlxalq təzyiqin gücləndirilməsi vacibdir. Bu fonla, regionda və dünyada insan haqları məsələləri üzrə fəal monitorinqlərin aparılması zərurəti daha da artır.
Mənbə: Azərbaycan.media