Azərbaycan.media xəbər verir ki, jurnalist Fəridə Aslanova Milli Onkologiya Mərkəzində baş verən faciəvi hadisə ilə bağlı emosional paylaşım edib.
O, partlayış nəticəsində həyatını itirən həkimin ölümündən sarsıldığını bildirib və bu faciəyə susqun qala bilmədiyini qeyd edib. Müəllif yazır ki, cəmiyyət həm peşəkar və vicdanlı həkimləri, həm də bu peşəyə yaraşmayan şəxsləri yaxşı tanıyır və heç nə xalqın gözündən yayınmır.
Paylaşımda vurğulanır ki, həyatını itirən həkim öz sahəsində nadir mütəxəssislərdən biri olub və həmin zirvəyə böyük zəhmətlə yüksəlib. Müəllifə görə, bir həkimin faciəsi yalnız ailəsinin deyil, bütöv cəmiyyətin dərdidir.
Fəridə Aslanova onkoloji xəstələrin yaşadığı maddi və mənəvi çətinliklərdən də geniş bəhs edib. O bildirib ki, bəzi ailələr müalicə xərclərini qarşılamaq üçün evini, maşınını satır, maddi imkanı zəif olan insanlar isə ağır psixoloji sarsıntı yaşayır. Müəllif qeyd edir ki, belə ağır vəziyyətlərdə insanlar bəzən əsəbi və çarəsiz hala düşürlər.
Jurnalist sosial şəbəkələrdə hadisəyə münasibətin iki fərqli qütbə bölündüyünü də qeyd edib. Onun sözlərinə görə, faciəyə görə kədərlənənlərlə yanaşı, buna sevinən insanların olması cəmiyyətin nə qədər aqressivləşdiyini göstərir.
Fəridə Aslanova öz şəxsi həyatından da danışaraq bildirib ki, bir neçə il əvvəl anasının müalicəsi ilə bağlı yolları Milli Onkologiya Mərkəzindən keçib. O, həmin günləri həyatının ən ağır dövrlərindən biri kimi xatırladığını deyib:
“Anamı kimyaterapiyaya aparıb-gətirdikcə sanki hər gün ölüb-dirildim. Oradakı insanların ağrısını, ümidsizliyini, gözləntilərini gördükcə həyatın nə qədər ağır olduğunu daha dərindən hiss etdim.”
Müəllif xəstəxanadakı uzun növbələrdən, bəzi avadanlıqların işləməməsindən, insanların yaşadığı gərginlikdən də bəhs edib. O qeyd edib ki, sistemdəki problemlər bəzən peşəkar həkimlərin də cəmiyyətdə yanlış tanınmasına səbəb olur.
Paylaşımın sonunda jurnalist ölkədə xərçəng xəstələri üçün daha güclü sosial dəstək mexanizmlərinin yaradılmasının vacibliyini vurğulayıb. O, xüsusi yardım fondunun yaradılması və tibbi sığorta sisteminin daha effektiv işləməsi ilə bağlı təkliflərini səsləndirib.
Müəllif sonda həyatını itirən həkimə və hadisənin digər qurbanına Allahdan rəhmət diləyib.
Mənbə: Azərbaycan.media
Jurnalist Fəridə Aslanovanın sosial şəbəkə paylaşımı