Azərbaycan.media xəbər verir ki, Böyük Britaniyanın Baş naziri Kir Starmer ABŞ Prezidenti Donald Tramp tərəfindən irəli sürülən Qəzza üçün Sülh Şurası təşəbbüsünə qoşulmaq niyyətində deyil.
Britaniya rəsmiləri üzvlük üçün bir milyard dollar tələb olunan və tərkibində Rusiya Prezidenti Vladimir Putinin də yer aldığı bu quruma qoşulmağı məqsədəuyğun hesab etmirlər.
Məlumata görə, ABŞ–Böyük Britaniya münasibətlərinin onsuz da gərgin olduğu bir dövrdə Donald Trampın Britaniyanın Mavrikiyə Çaqos adaları üzərində suverenliyini geri qaytarmaq niyyətini “tam zəiflik” kimi qiymətləndirməsi Londonda narazılıq yaradıb. Qeyd edək ki, Çaqos adalarında ABŞ və Böyük Britaniyanın birgə hərbi hava bazası yerləşir.
Baş nazir Kir Starmer bu həftə Sülh Şurasının şərtləri ilə bağlı müttəfiqlərlə məsləhətləşmələr apardığını bildirsə də, hökumətə yaxın mənbələr onun belə bir quruma qoşulmasının real olmadığını vurğulayırlar. Rəsmilərdən biri bildirib: “Vergiödəyicilərinin bir milyard dollarını Putinin də yer aldığı bir şurada oturmaq üçün xərcləmək qəbuledilən deyil”.