Azərbaycan.media xəbər verir ki, humanitar yardım məqsədilə nəzərdə tutulmuş növbəti elektrik avadanlıqları yükü Sumqayıt Texnologiyalar Parkından Ukraynaya yola salınıb.
Yardımın göndərilməsi Azərbaycan Prezidenti İlham Əliyevin 16 yanvar 2026-cı il tarixli Sərəncamına əsasən Energetika Nazirliyi tərəfindən təmin edilib.
Humanitar yükə 12 ədəd alçaq gərginlik paneli, 11 ədəd generator, 5 ədəd transformator və 27 min metr kabel və naqil daxildir. Ukrayna tərəfinin müraciəti əsasında təşkil olunan yardımın ümumi dəyəri 1 milyon dollar təşkil edir.
Qeyd olunur ki, Azərbaycan bundan əvvəl də Ukraynaya elektrik təchizatı ilə bağlı humanitar yardımlar göndərib. Ölkəmizin Ukraynaya göstərdiyi ümumi humanitar dəstək, o cümlədən bərpa və yenidənqurma yönümlü yardımların ümumi dəyəri artıq 45 milyon dolları ötüb.