Azərbaycan.media xəbər verir ki, Kopenhagen yaxınlığındakı Öresund boğazının sularında arxeoloqlar indiyə qədər tapılan ən böyük orta əsr dişli tipli ticarət gəmisini aşkarlayıblar. Publika.az-ın “Independent” qəzetinə istinadən verdiyi məlumata görə, gəmi “Svaelget 2” adlandırılıb və XV əsrdə Şimali Avropada ticarətin miqyasına dair anlayışları dəyişdirir.
Gəminin uzunluğu 28 metr, eni 9 metr, hündürlüyü 6 metrdir və təxminən 1410-cu ildə inşa edilib. O, 300 ton yük daşıya bilirdi ki, bu da belə gəmilər üçün rekord göstəricidir. Qazıntıların rəhbəri, dəniz arxeoloqu Otto Uldum bu kəşfi dəniz arxeologiyasında mühüm mərhələ adlandırıb və gəminin orta əsrlərdə necə tikildiyi və qorunduğu barədə yeni anlayışlar yaratdığını bildirib.
Alimlərin sözlərinə görə, gəminin taxtaları iki fərqli bölgədən gətirilib: palıd taxtalar Pomeraniyadan (müasir Polşa), çərçivə isə Niderlanddan. Bu da gəminin Niderlandda inşa edildiyi ehtimalını artırır.
Gəmi 13 metr dərinlikdə qoruyucu lil təbəqəsi sayəsində mükəmməl şəkildə qorunub saxlanılıb. Arxeoloqlar gəmidə hündür “qalalar”, kərpic mətbəxin qalıqları, dənizçilərin şəxsi əşyaları – ayaqqabı, daraq, dua muncuqları, tunc və keramika qablar tapıblar.
Otto Uldum qeyd edib ki, bu tapıntılar heyət üzvlərinin quru həyatına aid əşyaları daşıdıqlarını göstərir. Gəmidə silah və döyüş əlamətləri olmadığı üçün onun sırf ticarət məqsədli olduğu güman edilir.