Azərbaycan.media xəbər verir ki, ötən gün ABŞ ordusunun Venesuelanın paytaxtı Karakasa endirdiyi hava zərbələri ilə başlayan xüsusi əməliyyat qısa müddətdə uğurla başa çatıb. Rəsmi olmayan məlumatlara görə, cəmi üç saata yaxın davam edən əməliyyat nəticəsində Venesuela Prezidenti Nikolas Maduro və həyat yoldaşı iqamətgahlarında ələ keçirilib və dərhal ölkədən çıxarılıb.
Əməliyyat zamanı heç bir itkinin qeydə alınmaması xüsusilə diqqət çəkir. Bildirilir ki, bir neçə ay ərzində planlaşdırılan və gecə saatlarında həyata keçirilən bu yüksək dəqiqlikli xüsusi əməliyyat ABŞ ordusunun elit bölməsi hesab olunan “Delta Force”un icrası ilə baş tutub. Hadisə həm hərbi dairələrdə, həm də beynəlxalq mediada geniş rezonans doğurub.
Bahalı, gizli və qeyri-adi “Delta Force”
“Delta Force”un rəsmi adı 1-ci Xüsusi Qüvvələrin Əməliyyat Dəstəsi – Deltadır (ing. 1st Special Forces Operational Detachment–Delta, 1st SFOD-D). Bu birlik həmçinin “Delta”, “Delta Force” və ya Combat Applications Group (CAG) adları ilə tanınır.
ABŞ-ın Elit Xüsusi Əməliyyat Qüvvələrinin (SOF) əsas sütunlarından biri olan “Delta Force” Müştərək Xüsusi Əməliyyatlar Komandanlığına (JSOC) tabedir. Qrupun yaradılması ilə bağlı qərar 21 noyabr 1977-ci ildə qəbul edilib, ilk bölmələr isə 1978-ci ildə formalaşdırılıb.
“Delta Force” əsasən antiterror əməliyyatları və xüsusi təyinatlı missiyalar üçün nəzərdə tutulub. Dəstə yalnız ən yüksək fiziki və psixoloji göstəricilərə malik, xüsusi seçim və hazırlıq mərhələlərindən keçmiş hərbçilərdən ibarətdir. Onların fəaliyyəti ciddi məxfilik rejimi altında aparılır və əməliyyatların böyük əksəriyyəti rəsmi şəkildə təsdiqlənmir.
Girovların xilas edilməsi və gizli basqınlar
“Delta Force”un əsas vəzifələrinə girovların xilas edilməsi, yüksək riskli basqınlar, düşmən qüvvələrinin neytrallaşdırılması və xüsusi kəşfiyyat tapşırıqları daxildir. Qrupun tarixində ilk böyük əməliyyat 1980-ci ildə İranda girov saxlanılan ABŞ diplomatlarının azad edilməsi məqsədi daşıyan “Qartalın Pəncəsi” əməliyyatı olub.
Həmin əməliyyatın uğursuzluğundan çıxarılan dərslər nəticəsində ABŞ ordusunda xüsusi hava dəstəyi üçün 160-cı Xüsusi Əməliyyat Aviasiya Alayı yaradılıb ki, bu gün də “Delta Force”un əsas taktiki dayaqlarından biri hesab olunur.
Milyardlarla ölçülən büdcə
Mütəxəssislərin və açıq mənbələrin iddialarına görə, “Delta Force”un illik büdcəsi təxminən 2 milyard dollara yaxındır. Bu vəsait əsasən gizli əməliyyatlar, yüksək texnologiyalı avadanlıqlar, xüsusi təlimlər və qlobal miqyasda aparılan məxfi missiyalar üçün xərclənir.
Karakasda baş verdiyi iddia olunan son əməliyyat isə bir daha göstərdi ki, “Delta Force” ABŞ-ın ən mürəkkəb və riskli tapşırıqları yerinə yetirmək üçün saxladığı əsas hərbi alətlərdən biri olaraq qalır.