Azərbaycan.media xəbər verir ki, ABŞ, Kanada, İsrail, Rusiya, Türkiyə və ərəb ölkələrində fəaliyyət göstərən diaspor və mədəniyyət təşkilatları, həmçinin beynəlxalq qurumlar Azərbaycan Respublikasının Prezidenti İlham Əliyevə doğum günü, Dünya Azərbaycanlılarının Həmrəyliyi Günü və Yeni il münasibətilə təbrik məktubları ünvanlayıblar.
Təbriklərdə Prezidentin uzaqgörən siyasəti, milli maraqların ardıcıl müdafiəsi, Azərbaycan dövlətinin beynəlxalq nüfuzunun gücləndirilməsi və ötən illərdə tarixi Zəfərin qazanılması qeyd olunub. Məktublarda həmçinin xaricdə yaşayan azərbaycanlıların birliyi və Vətənə bağlılığı vurğulanıb.
Qeyd olunan qurumlar və şəxslər arasında ABŞ-Azərbaycan İnteqrasiya Mərkəzinin rəhbəri Samir Novruzov, Kanada Mədəniyyət Mərkəzləri və “Baku Production” layihəsinin təsisçiləri, İsraildəki “Şolumi” və Qafqaz Yəhudilərinin Mədəniyyət Mərkəzləri, Ərəb Ölkələrində Yaşayan Azərbaycanlıların Koordinasiya Şurası, Türkiyədə Əskişəhər Azərbaycanlılar Dərnəyi, ABŞ-də Hyuston-Bakı Qardaşlaşmış Şəhərlər Assosiasiyası və Yuta Azərbaycan Dostluq Təşkilatı, Rusiya Federasiyasının hökumət və parlament rəsmiləri, Türk Dövlətləri Parlament Assambleyasının Baş katibi və digər təşkilatlar yer alıb.
Təbrik məktublarında Prezident İlham Əliyevin rəhbərliyi ilə əldə edilmiş uğurlar, beynəlxalq görüşlər, iqtisadi və mədəni layihələr, habelə diaspor fəaliyyəti və xaricdə yaşayan azərbaycanlıların birliyi xüsusi olaraq vurğulanıb. Məktublarda həmçinin 2026-cı ildə Azərbaycan üçün yeni nailiyyətlər və firavanlıq arzuları ifadə edilib.