Azərbaycan.media xəbər verir ki, aparılan araşdırmalar yeməklərə çili bibəri əlavə etməyin maddələr mübadiləsini təxminən 5 faiz sürətləndirdiyini göstərir.
Tədqiqat “FOOD Quality and Preference” adlı akademik jurnalda dərc olunub. Araşdırmanın aparıcı müəllifi Pensilvaniya Dövlət Universitetinin tədqiqatçısı, həkim Paige Çunninqemdir.
Tədqiqat nəticələrinə əsasən, yeməklərdə ədviyyat miqdarı artdıqca yemə sürəti yavaşlayır və istehlak edilən qida miqdarı azalır. Çunninqem qeyd edib ki, yeməyi ləzzətli etmək üçün kifayət qədər çili bibəri əlavə etmək, dad zövqünü pozmadan daha az yeməyə kömək edə bilər.
Məlumata görə, çili bibərlərinin tərkibində kapsaisin adlı maddə mövcuddur. Bu birləşmə bibərlərə acılıq verən əsas komponent olmaqla yanaşı, maddələr mübadiləsinin sürətlənməsində də rol oynayır. Piedmont Atlanta Xəstəxanasının klinik dietoloqu Heli Robinsonun sözlərinə görə, kapsaisin bədən istiliyini artırır, metabolizmi aktivləşdirir və kalorilərin daha sürətli yandırılmasına şərait yaradır.
Araşdırmalar həmçinin göstərir ki, daha çox ədviyyatlı qida qəbul edən insanlar gün ərzində daha az yeməyə meyllidirlər. Harvard Universitetində aparılan tədqiqatlar isə müntəzəm olaraq çili bibəri yeyən şəxslərin ürək-damar xəstəliklərindən ölüm riskinin daha aşağı olduğunu ortaya qoyub. Belə ki, demək olar ki, hər gün ədviyyatlı qida qəbul edənlərin ölüm riski həftədə bir dəfə yeyənlərlə müqayisədə 14 faiz azdır.
Bununla belə, mütəxəssislər qeyd edirlər ki, bu faydalara ehtiyatla yanaşmaq və çili bibərinin istehlak miqdarını nəzarətdə saxlamaq vacibdir.