Ailə mübahisələri: səbəblər və sağlam həll yolları
Ailə daxilində yaranan mübahisələr münasibətlərin təbii bir parçası olsa da, onlar düzgün idarə edildikdə əlaqələrin daha güclü və sağlam olmasına gətirib çıxara bilər. Ailələrdə fərqli düşüncələr, dəyərlər və gözləntilər zaman-zaman fikir ayrılıqlarına səbəb olur. Psixoloqlar bu cür mübahisələrin arxasında duran əsas faktorları və onların effektiv həlli üçün tövsiyələri açıqlayırlar. Azərbaycan.media saytının “Qaranlıqdan işığa” rubrikası çərçivəsində bu mövzuda əsas problemi və onların praktik həll yollarını təqdim edirik.
Mübahisələrin yaranma səbəbləri
Fərqli gözləntilər. Ailə üzvlərinin bir-birindən gözləntiləri çox vaxt üst-üstə düşmür. Məsələn, bir valideynin akademik nailiyyətə üstünlük verməsi, digərinin isə yaradıcılığa dəyər verməsi fikir ayrılığı yarada bilər.
Kommunikasiya çatışmazlığı. Duyğuların və düşüncələrin açıq şəkildə ifadə olunmaması yanlış anlaşılmalara gətirib çıxarır. Ünsiyyətin yetərli olmaması kiçik problemlərin belə böyüməsinə səbəb ola bilər.
Stress və yorğunluq. Günlük həyatın yüklənməsi ailə üzvlərini emosional baxımdan həssas edir. Yorğunluq və gərginlik tez-tez mübahisələrin alovlanmasına şərait yaradır.
Maliyyə çətinlikləri. Ailə büdcəsi ilə bağlı məsələlər cəmiyyətin böyük hissəsində ən yaygın mübahisə səbəblərindəndir. Pul mövzusu həssas olduğu üçün fikir ayrılıqları tez baş verir.
Ailə rolu və məsuliyyət bölgüsü. Ev işləri və uşağa qayğı kimi gündəlik məsuliyyətlər bəzən qeyri-bərabər bölündüyündə narazılıqlar yarana bilər.
Mübahisələrin həlli üçün tövsiyələr
Səmimi ünsiyyət. Ailə üzvləri arasında açıq və dürüst dialoq münasibətlərin möhkəmlənməsi üçün vacibdir. Hər kəsin fikrini sərbəst ifadə edə biləcəyi mühit formalaşdırılmalıdır.
Müzakirəyə zaman ayırmaq. Problemlər xüsusi vaxt ayrılaraq, sakit şəraitdə müzakirə olunduqda tərəflər arasında anlayış formalaşır və çözüm yolları daha asan tapılır.
Emosiyalara nəzarət. Mübahisə zamanı emosiyalar yüksələ bilər, lakin sakitliyini qorumaq məsələnin daha sağlam şəkildə həllinə imkan yaradır.
Kompromis tapmaq. Mübahisələrin konstruktiv həlli üçün ortaq məxrəcə gəlmək vacibdir. Hər iki tərəfi qane edən yanaşma ailə içi harmoniyanı gücləndirir.
Dəstək göstərmək. Ailə üzvləri bir-birini başa düşməyə çalışdıqda və emosional dəstək verdikdə mübahisələrin həlli daha asan olur.
Peşəkar yardım. Bəzi hallarda psixoloq və ya ailə terapevtindən dəstək almaq problemin kökündən aydınlaşdırılmasına kömək edir.
Müəllif: Almara AĞAQIZI
“PRİM – Psixososial Reabilitasiya və İnkişaf Mərkəzi”nin direktoru
📞 +994 50 207 80 04
📍 Ünvan: Bakı şəhəri, Zahid Xəlilov 48A (Elmlər Akademiyası metrosu yaxınlığı)
Mənbə: Azərbaycan.media