Azərbaycan.media xəbər verir ki, Azərbaycanla Çexiya arasında iqtisadi əlaqələr getdikcə genişlənir və daha şaxələndirilmiş əməkdaşlıq modelinə doğru inkişaf edir.
Son dövrlərdə yüksək səviyyəli qarşılıqlı səfərlər, xüsusilə Çexiyanın Baş naziri Andrey Babişin Azərbaycana səfəri bu münasibətlərə yeni dinamika qazandırıb. Prezident İlham Əliyevlə keçirilən görüşlər və təşkil olunan biznes forum iki ölkə arasında əməkdaşlığın keyfiyyətcə yeni mərhələyə keçdiyini göstərir.
Deputat Tahir Mirkişili bildirib ki, Bakı–Praqa münasibətlərində iqtisadi komponent getdikcə ön plana çıxır. Onun sözlərinə görə, ticarət dövriyyəsinin 800 milyon dolları ötmesi müsbət göstəricidir, lakin bu dövriyyədə əsas payın neft sektoruna məxsus olması iqtisadi əlaqələrin şaxələndirilməsini zəruri edir.
Deputat vurğulayıb ki, sənaye, yüksək texnologiyalar, nəqliyyat-logistika və kənd təsərrüfatı kimi sahələr əməkdaşlığın inkişafı üçün əsas istiqamətlər hesab olunur. Energetika sahəsi isə hələ də tərəfdaşlığın əsas dayağı olaraq qalır. Azərbaycanın Avropaya qaz ixracının genişlənməsi və artıq 16 ölkəni əhatə etməsi ölkənin enerji diplomatiyasının effektivliyini göstərir.
Onun sözlərinə görə, müdafiə sənayesi sahəsində də əməkdaşlıq perspektivlidir. Artıq tərəflər təkcə məhsul tədarükü ilə kifayətlənmir, həm də birgə istehsal və texnologiya mübadiləsi istiqamətində konkret layihələri müzakirə edirlər.
Deputat Mehriban Vəliyeva isə qeyd edib ki, keçirilən görüşlər və geniş gündəlik əməkdaşlığın sistemli şəkildə inkişaf etdiyini təsdiqləyir. Onun fikrincə, iqtisadi əlaqələrin diversifikasiyası və qeyri-neft sektorunda birgə layihələrin artırılması qarşıdakı dövrün əsas prioritetlərindən olacaq.
Qeyd edilib ki, Hökumətlərarası Komissiyanın fəaliyyətinin aktivləşdirilməsi iqtisadi əməkdaşlığın institusional əsaslarını daha da möhkəmləndirəcək və müxtəlif sahələr üzrə layihələrin icrasını sürətləndirəcək.
Ümumilikdə, mövcud siyasi iradə və artan biznes marağı fonunda Azərbaycan–Çexiya münasibətlərinin yaxın illərdə daha da genişlənəcəyi gözlənilir.
