Azərbaycan.media xəbər verir ki, hazırda Kiyevin Ukraynanın enerji infrastrukturunu mütəmadi olaraq bombalayan, Saratov vilayətindən və ya Xəzər dənizindən raketlər buraxan Rusiyanın strateji raketdaşıyıcılarını havada məhv etmək imkanı yoxdur. Bununla belə, bu istiqamətdə işlərin tam məxfilik şəraitində aparılması ehtimalı istisna edilmir.
Bu barədə ukraynalı hərbi ekspert İvan Kiriçevski məlumat verib. Onun sözlərinə görə, hərb tarixində uzaq məsafədən Sovet “Tu-95” bombardmançılarını ələ keçirmək üçün nəzərdə tutulmuş xüsusi vasitələr mövcud olub.
Ekspert qeyd edib ki, söhbət 1959–1972-ci illərdə ABŞ və Kanada ordularında xidmətdə olan, bəzi versiyalarda 800 kilometrədək məsafə qət etmək imkanına malik CIM-10 “Bomarc” super güclü zenit raketlərindən gedir. Bu raketlər nüvə başlığı ilə təchiz olunmuşdu, çünki həmin dövrün texnologiyası belə uzaq məsafədə hədəfi yüksək dəqiqliklə vurmağa imkan vermirdi.
Kiriçevski bildirib ki, sərbəst düşən atom bombaları dövrü başa çatdıqdan və Sovet İttifaqı ABŞ-ı vurmaq üçün bombardmançıya ehtiyac olmayan nüvə raketlərinə keçdikdən sonra amerikalılar bu sistemdən imtina ediblər.
Ekspertin fikrincə, bu fakt göstərir ki, uzaqmənzilli strateji bombardmançıların havada məhv edilməsi texnoloji baxımdan olduqca mürəkkəb məsələdir və müasir dövrdə də real hərbi imkanlar baxımından ciddi çətinliklər yaradır.