Azərbaycan.media xəbər verir ki, yanvarın 25-də Rusiya ordusunun Nikolayev vilayətinə endirdiyi zərbə nəticəsində enerji obyekti ciddi şəkildə zədələnib, “Nikolayevoblenerqo” ASC-nin elektrik montyoru yaralanıb. Bu barədə şirkətin rəsmi Telegram kanalında məlumat yayılıb.
Məlumata görə, səhər saatlarında hava həyəcanı zamanı monitorinq kanalları Nikolayev vilayətinin Oçakov istiqamətinə doğru yüksək sürətli hədəfin hərəkət etdiyini qeydə alıb. Az sonra işğalçı qüvvələrin digər hədəflərlə yanaşı, enerji infrastrukturuna da hücum etdiyi bildirilib. Hücum zamanı həmin ərazidə xidmət aparan oblenerqonun əməkdaşı xəsarət alıb.
Şirkətin açıqlamasında qeyd olunub ki, zərərçəkən elektrik montyoru Vladimirin ətraf əzalarında qəlpə yaraları var. O, operativ şəkildə tibb müəssisəsinə çatdırılıb və hazırda ona zəruri tibbi yardım göstərilir. “Cəmiyyət reabilitasiya prosesini nəzarətdə saxlayacaq”, – deyə məlumatda vurğulanıb.
Bildirilib ki, partlayışlar nəticəsində oblenerqonun enerji avadanlıqları da ciddi şəkildə sıradan çıxıb. Şirkət açıqlamasında energetiklərin fəaliyyətinin yalnız naqillər və yarımstansiyalarla məhdudlaşmadığı, onların daim xəsarət riski və atəş təhlükəsi altında çalışaraq əhalinin elektrik enerjisi ilə təmin olunmasına məsuliyyət daşıdıqları xüsusi qeyd olunub.
Nikolayev
