Azərbaycan.media xəbər verir ki, 2026-cı ilin sərgi mövsümü may ayında paralel keçiriləcək bir neçə irimiqyaslı beynəlxalq tədbirlə start götürəcək. Bu barədə sərgilərin təşkilatçısı olan Iteca Caspian və Caspian Event Organisers şirkətlərinin birgə açıqlamasında bildirilib.
Məlumata görə, 5–8 may tarixlərində **Bakı Ekspo Mərkəzi**ndə regionun kənd təsərrüfatı və qida sənayesi üzrə mühüm tədbirləri keçiriləcək. Bunlara:
-
“Caspian Agro Week” – 19-cu Azərbaycan Beynəlxalq Kənd Təsərrüfatı Sərgisi,
-
“InterFood Azerbaijan” – 31-ci Azərbaycan Beynəlxalq Qida Sənayesi Sərgisi,
-
“Horeca Caspian” – 14-cü Xəzər Beynəlxalq Mehmanxana, Restoran və Supermarketlər üçün Avadanlıq və Ləvazimatlar Sərgisi daxildir.
Qeyd olunub ki, bu il “Caspian Agro” sərgisi yeni brend – “Caspian Agro Week” adı ilə təşkil ediləcək. Bu formatın sərgiyə yeni dinamika gətirəcəyi, iştirakçılar və ziyarətçilər üçün daha geniş netvörkinq, sektorlararası əməkdaşlıq və effektiv biznes dialoqu imkanları yaradacağı vurğulanıb.
1–3 iyun tarixlərində isə ilin ən mühüm tədbirlərindən biri olan “Baku Energy Week” (Bakı Enerji Həftəsi) keçiriləcək. Həftə çərçivəsində:
-
“Caspian Oil & Gas” – 31-ci Beynəlxalq Xəzər Neft və Qaz Sərgisi,
-
“Caspian Power” – 14-cü Xəzər Beynəlxalq Təmiz Enerji Sərgisi,
-
“Baku Energy Forum” – 31-ci Bakı Enerji Forumu təşkil olunacaq.
Eyni tarixlərdə – 1–3 iyunda “TransLogistica Caspian” – 23-cü Xəzər Beynəlxalq Nəqliyyat, Tranzit və Logistika Sərgisi keçiriləcək, 3 iyunda isə “TransLogistica Forum” baş tutacaq.
30 sentyabr – 2 oktyabr tarixlərində 6-cı Azərbaycan Beynəlxalq Müdafiə Sərgisi – “ADEX” və eyni vaxtda 15-ci Yubiley Beynəlxalq Daxili Təhlükəsizlik, Mühafizə və Xilasetmə Avadanlıqları Sərgisi – “Securex Caspian” təşkil ediləcək.
14–16 oktyabr tarixlərində “Caspian Construction Week” çərçivəsində:
-
“BakuBuild”,
-
“Aquatherm Baku”,
-
“Rebuild Karabakh”,
-
“Plastex Caspian”,
-
“Road & Traffic” sərgiləri bir məkanda keçiriləcək.
Payız mövsümü isə 29–31 oktyabr tarixlərində “Medinex” – 28-ci Azərbaycan Beynəlxalq Tibb İnnovasiyaları Sərgisi ilə yekunlaşacaq.
Açıqlamada bildirilib ki, beynəlxalq sərgilər Azərbaycanda biznes turizminin inkişafına, innovativ texnologiyaların və investisiyaların cəlbinə, həmçinin işgüzar fəallığın artmasına mühüm töhfə verir. Bu tədbirlər Bakını müxtəlif sənaye sahələri üzrə beynəlxalq dialoq, texnologiya mübadiləsi və biznes əməkdaşlığı üçün əsas mərkəzlərdən birinə çevirir.