Azərbaycan.media xəbər verir ki, burun tutulması soyuqdəymə və mövsümi allergiyanın ən geniş yayılmış əlamətlərindəndir. Nəfəsi yüngülləşdirmək üçün yalnız spreylər və dərmanlar deyil, düzgün seçilmiş qidalar da kömək edə bilər.
Xarici mediaya istinadla Lent.az bildirir ki, mütəxəssislər isti bulyonların xüsusilə faydalı olduğunu vurğulayır. İsti maye seliyi durulaşdırır, buxar isə burun yollarındakı tutulmanı azaldır. Toyuq bulyonu iltihab əleyhinə təsiri ilə tanınır. Oxşar effekt isti çaylarda da müşahidə olunur; buxar və nəmləndirici təsir burun keçidlərini müvəqqəti açır.
Yaşıl çayın tərkibindəki katexin antioksidantları burun axmasını azalda bilər. Çobanyastığı, zəncəfil, nanə və qarabuğda çayları da faydalı sayılsa da, elmi sübutlar hələ məhduddur. Çaya əlavə edilən bal isə öskürəyi yüngülləşdirir, bəlğəmi xaric etməyə kömək edir, lakin bir yaşından kiçik uşaqlara verilməməlidir.
Acı qidalar – məsələn, çili bibəri, wasabi, xardal və xren – selik ifrazını artıraraq burunu müvəqqəti açır. Ananas isə bromelain fermenti sayəsində seliyi durulaşdırır və iltihab əleyhinə təsir göstərə bilər. Probiotik yoqurtlar iltihabın azalmasına kömək edir və immunitet üçün vacib olan sink ehtiva edir. Şəkərsiz variantları, məsələn, yunan yoqurtu tövsiyə olunur.
Eyni zamanda alkoqoldan və yüksək şəkərli qidalardan uzaq durmaq vacibdir, çünki onlar iltihabı artıra və simptomları gücləndirə bilər. Həmçinin bəzi insanlarda yüksək histaminli məhsullar – pendir, emal olunmuş ətlər, turşular, şərab, pivə və bəzi meyvə-tərəvəzlər – əlamətləri ağırlaşdıra bilər.
Həkimlər bildirir ki, burun tutulması 10 gündən uzun davam edərsə və ya yüksək hərarət, nəfəs darlığı, susuzlaşma, yemək-içmədə çətinlik yaranarsa, mütləq tibbi yardıma müraciət edilməlidir. Özünü müalicə təhlükəli ola bilər.