Azərbaycan.media xəbər verir ki, ABŞ-ın Kaliforniya ştatında yaşayan 19 yaşlı psixologiya tələbəsi Sam Nelsonun ChatGPT-dən aldığı məsləhətlər nəticəsində həyatını itirdiyi iddia olunur.
Yayımlanan toksikoloji hesabat göstərir ki, gəncin ölümünə kratom, Xanax və alkoqolun birlikdə istifadəsi səbəb olub.
Nelsonun anası Layla Turner-Scott-un paylaşdığı məlumata görə, oğlunun son 18 ay ərzində ChatGPT ilə apardığı yazışmalar süni intellektin müxtəlif maddələrin birləşdirilməsinə dair son dərəcə riskli tövsiyələr verdiyini göstərib. İddialara əsasən, sistem bu maddələrin kombinasiyasını “təhlükəsiz” kimi təqdim edib.
Qeydlərə görə, Sam Nelson kratomu (opioidə bənzər təsir göstərən) narahatlıq əleyhinə Xanax ilə birlikdə qəbul edib-etməmək barədə ChatGPT-dən məsləhət alıb. Bot isə gəncin artıq 15 qram kratom qəbul etdiyini bildiyi halda, yaranan ürəkbulanmanı azaltmaq üçün Xanax istifadə edə biləcəyini və dozanı necə tənzimləməli olduğunu tövsiyə edib.
Bundan başqa, 26 may tarixində aparılan başqa bir yazışmada ChatGPT-nin Nelsona halüsinasiyaların daha güclü olması üçün öskürək şərbətinin dozasını ikiqat artırmağı tövsiyə etdiyi iddia olunur.
Sam Nelson 31 may tarixində anası tərəfindən yataq otağında ölü vəziyyətdə tapılıb. Hadisədən iki həftə sonra açıqlanan toksikoloji hesabat ölümün səbəbi kimi alkoqol, Xanax və kratomun birlikdə istifadəsini göstərib. Mütəxəssislərin rəyinə görə, bu maddələrin kombinasiyası mərkəzi sinir sistemini həddindən artıq basqılayaraq nəfəs funksiyasının ciddi şəkildə pozulmasına səbəb olur.