Azərbaycan.media xəbər verir ki, Ukrayna son həftələrdə Rusiyanın “kölgə donanması” kimi tanınan neft tankerlərinə qarşı dəniz və hava dronları ilə hücumları intensivləşdirib. Xarici KİV-lərin məlumatına görə, bu müddət ərzində dörd neft tankerinə zərbə endirilib.
Məlumata əsasən, tankerlərdən üçü Qara dənizdə dəniz dronları ilə, biri isə Ukraynadan 1 200 mildən çox məsafədə – Aralıq dənizində hava dronları vasitəsilə vurulub. Sözügedən gəmilərin Rusiyaya beynəlxalq sanksiyalardan yan keçərək neft daşınmasında istifadə edilən “kölgə donanması” ilə əlaqəli olduğu bildirilir.
Ukraynanın Təhlükəsizlik Xidməti açıqlayıb ki, hücuma məruz qalan bütün tankerlər Rusiya limanlarına, xüsusilə Qara dənizdəki ən böyük neft mərkəzlərindən biri olan Novorossiyskə neft yükləmək üçün göndərilib. Qeyd olunub ki, zərbələr endirilən vaxtda gəmilər boş vəziyyətdə olub.
Mütəxəssislər bildirirlər ki, neft hələ də “Rusiya təcavüzünün əsas maliyyə mənbəyi” olaraq qalır və bu səbəbdən enerji infrastrukturu ilə bağlı hədəflər xüsusi əhəmiyyət daşıyır. “Pul yoxdur – hərbi maşın yoxdur” yanaşması Ukraynanın strategiyasının əsasını təşkil edir.
Məlumata görə, hücumlarda Ukrayna kəşfiyyatı tərəfindən hazırlanmış, uzaq məsafələri qət edə bilən, idarə olunan və dənizdəki hədəflərə dəqiq zərbələr endirmək imkanına malik “dəniz körpələri” adlandırılan dronlardan istifadə olunur.