Azərbaycan.media xəbər verir ki, Mingəçevir şəhərində yerləşən “Baku Electronics” MMC-yə məxsus məişət avadanlıqları mağazasında yanğın təhlükəsizliyi ilə bağlı yoxlamalar zamanı ciddi nöqsanlar aşkar edilib.
Fövqəladə Hallar Nazirliyi bildirir ki, obyektin yanğınxəbərverici siqnalizasiya qurğusu tam quraşdırılmayıb, mövcud olan qurğu isə nasazdır. Həmçinin elektrik təsərrüfatı “Elektrik Qurğularının Quraşdırılması Qaydaları”na uyğun qurulmayıb.
Daxili yanğın kranları işlək vəziyyətdə deyil, zirzəmidə qeyri-standart elektrik qızdırıcısından istifadə olunur, obyekt odsöndürən balonlarla təmin edilməyib. Yanğın zamanı insanların təxliyəsi üçün köçürmə planı tərtib olunmayıb, zirzəmidə təxliyə yolları yanğın təhlükəsizliyi tələblərinə uyğun deyil və müxtəlif təyinatlı otaqlar tikərkən tikinti və texnoloji layihələndirmə normalarına əməl edilməyib.
Mağazanın birinci mərtəbəsində havalandırma sistemi mövcud deyil, daşınmaz əmlakın icbarı sığorta şəhadətnaməsi təqdim edilməyib, anbar sahəsi isə çoxmərtəbəli yaşayış binasının zirzəmi mərtəbəsində yerləşdirilib ki, bu da tikinti norma və qaydalarına ziddir.
Bütün bu nöqsanlar nəzərə alınaraq, yanğın təhlükəsizliyi norma və qaydalarının kobud şəkildə pozulması səbəbindən mağazanın fəaliyyəti dayandırılıb və qərarın bir nüsxəsi obyektin nümayəndəsinə təqdim edilib.