Azərbaycan.media xəbər verir ki, sülh danışıqları ilə bağlı Berlində səfərdə olan Ukrayna Prezidenti Volodimir Zelenski Almaniya Kansleri Olaf Şolts ilə birgə mətbuat konfransında danışıb.
Zelenski qeyd edib ki, çoxsaylı məsələlərdə həqiqətən irəliləyiş əldə olunub, lakin əldə edilən nəticələrin qarşı tərəf tərəfindən necə qəbul ediləcəyini hələ də bilmir: “Vacib olan odur ki, biz eşidildik”.
O, bəzi müzakirə mövzularının Ukraynanın mövqeyinə zidd olduğunu vurğulayaraq, bunların sənədlərin yeni versiyalarında əks olunmamasını istəyib:
“Mənim üçün Ukraynanın ləyaqəti və ərazi məsələləri çox əhəmiyyətlidir. Bu, əlbəttə ki, çox ağrılıdır. Rusiya çox şey istəyir. Bu, uzun bir dialoqdur. Biz onların nə istədiyini yaxşı anlayırıq”.
Zelenski ABŞ tərəfinə Ukraynanın mövqeyinin aydın şəkildə çatdırıldığını və qarşılıqlı anlaşmanın təmin olunduğunu bildirib:
“Çox şadam ki, biz bir-birimizi eşitdik. Amerika tərəf vasitəçi kimi müxtəlif addımlar təklif edəcək ki, müəyyən konsensus əldə olunsun. Ümid edirəm ki, ABŞ bu vasitəçilik rolunu davam etdirəcək. Bu, bizim üçün perspektivli olar”.
Prezident həmçinin Ukraynanın bərpası məsələsinə toxunaraq, maliyyə və təhlükəsizlik zəmanətləri ilə bağlı dialoqun vacib olduğunu qeyd edib:
“Biz hər şeyi edəcəyik ki, təhlükəsizlik zəmanətləri və maliyyə məsələlərinin kim tərəfindən təmin olunacağını aydınlaşdıraq. Bilməliyik ki, maliyyələşmə mənbələri haradan gələcək və necə təmin olunacaq”.
O, Rusiyanın dondurulmuş aktivlərinin də mümkün maliyyə mənbəyi ola biləcəyini əlavə edib və qeyd edib ki, təhlükəsizlik zəmanətləri üçün çərçivə müqavilələri hazırlanacaq, bu isə çox sahədə irəliləyişlərin əldə olunmasına imkan verib.