Azərbaycan.media xəbər verir ki, dekabrın 11-də Bakı Hərbi Məhkəməsində Ermənistan Respublikasının vətəndaşları — Arayik Harutyunyan, Arkadi Qukasyan, Bako Sahakyan, Davit İşxanyan, David Babayan, Levon Mnatsakanyan və digərlərinin sülh və insanlıq əleyhinə cinayətlər, müharibə cinayətləri, təcavüzkar müharibənin hazırlanması və aparılması, soyqırımı, müharibə qanunlarını pozma, terrorçuluq, hakimiyyəti zorla ələ keçirmə və digər cinayətlərdə ittiham olunması üzrə açıq məhkəmə prosesi davam etdirilib.
İclas hakim Zeynal Ağayevin sədrliyi ilə Camal Ramazanov və Anar Rzayevdən ibarət tərkibdə (ehtiyat hakim Günel Səmədova) keçirilib. Təqsirləndirilən şəxslərin hər biri bildikləri dildə tərcüməçi və müdafiəçilərlə təmin olunub. İclasda həmçinin zərərçəkmiş şəxslərin nümayəndələri və dövlət ittihamını müdafiə edən prokurorlar iştirak ediblər.
Baş prokurorun böyük köməkçisi Vüsal Əliyev çıxışında təqsirləndirilən şəxslərin cinayətkar birlikdəki rollarını şərh edib. Bildirib ki, Birinci Qarabağ müharibəsi başlamazdan əvvəl formalaşdırılmış bu dəstələr Ermənistan rəhbərliyi tərəfindən silahlandırılıb və dəstəklənib. Daha sonra həmin şəxslər Azərbaycanın işğal olunmuş ərazilərində yaradılmış qondarma qurum və Ermənistanda mühüm siyasi və hərbi vəzifələr tutublar.
Prokuror qeyd edib ki, məsələn, David Manukyan Şuşa batalyonunun üzvü, Davit İşxanyan isə “28-ci Martuni” batalyonunun komandiri olub. Bu batalyonlar qanunsuz dəstələrin daha təşkilatlanmış və hərbiləşdirilmiş forması idi. Dövlət ittihamçısı vurğulayıb ki, bütün təqsirləndirilən şəxslər cinayətkar birliyin vahid məqsədlərinə çatmaq üçün üzərlərinə düşən funksiyaları icra ediblər.
İclasda həmçinin müdafiəçilərin replikaları dinlənilib. Təqsirləndirilən şəxslər Vasili Beqlaryan, Arkadi Qukasyan, David Manukyan, Davit İşxanyan, Arayik Harutyunyan, Bako Sahakyan və digərləri son sözlərini söyləyiblər. Onların bir qismi cinayətkar olmadığını bildirərək bəraət tələb edib, digərləri isə müəyyən hallarda əmrləri icra etdiklərini qeyd edib.
Zərərçəkmişlərin nümayəndələri çıxışlarında təqsirləndirilən şəxslərin ədalətli cəzaya məhkum olunmasını xahiş ediblər. Onlar vurğulayıblar ki, işğal nəticəsində onların konstitusion hüquqları, mülkiyyət və təhlükəsizlik hüquqları pozulub.
Məhkəmə iclasında fasilə elan olunub. Son söz çıxışları növbəti məhkəmə iclasında davam etdiriləcək. Prosess dekabrın 19-da davam etdiriləcək.
Qeyd edək ki, Ermənistan dövlətinin və onun qurumlarının rəhbərliyi, hərbi qüvvələri və qanunsuz silahlı birləşmələrin iştirakı, habelə mərkəzləşdirilmiş idarəçilik və dəstək nəticəsində Azərbaycan ərazilərinə qarşı törədilmiş təcavüzkar müharibə və digər cinayət faktları üzrə 15 təqsirləndirilən şəxs ittiham olunub. Onlar Azərbaycan Respublikası Cinayət Məcəlləsinin müxtəlif maddələri ilə, o cümlədən təcavüzkar müharibəni planlaşdırma və aparma, soyqırımı, terrorçuluq, insan hüquqlarını pozma və digər ağır cinayətlərdə ittiham edilirlər.