İqtisadiyyat Manşet

Azərbaycanda gəlir vergisi 3 % olacaq – amma regionla müqayisədə real gəlir niyə aşağı qalır?

04 Aralık 2025 - 09:13
Fuad Biləsuvarlı

Azərbaycan.media xəbər verir ki, maliyyə naziri Sahil Babayev Milli Məclisin plenar iclasında 2026-cı ildən etibarən özəl sektorda aylıq gəliri 2500 manata qədər olan işçilərin cəmi 3 % gəlir vergisi ödəyəcəyini bildirib. Nazir bu qərarı “özəl sektorun inkişafı üçün hökumətin yaratdığı böyük güzəşt” kimi xarakterizə edib.

Sahil Babayev qeyd edib ki, yeni güzəşt olmasaydı, 2500 manata qədər gəlir 14 %, daha yüksək gəlir isə 25 % vergi ilə cəlb olunacaqdı. Yeni yanaşmaya əsasən, güzəşt tədricən dəyişəcək:

  • 2026-cı ildə – 3 %,

  • 2027-ci ildə – 5 %,

  • 2028-ci ildən – 7 %.

Dövlət sektorunda və neft-qaz sahəsində çalışanların vergi dərəcələri isə dəyişməz qalır:

  • 2500 manata qədər gəlirdən 14 %,

  • 2500 manatdan yuxarı gəlirdən 25 % tutulacaq.

Region ölkələrində durum

Nazir bildirib ki, gəlir vergisinin 3 % olduğu ölkə çox azdır. Amma müqayisələr göstərir ki, region ölkələrində vergi yüksək olsa da, orta əməkhaqqı daha böyükdür və nəticədə işçilərin əlində qalan real məbləğ Azərbaycandakından daha çoxdur.

Məsələn:

  • Rusiya: Orta maaş 1247 dollar, vergi 13 %, sərəncamda qalan 1084 dollar

  • Türkiyə: Orta maaş 1130 dollar, vergi 15 %, sərəncamda qalan 960 dollar

  • Qazaxıstan: Orta maaş 847 dollar, vergi 10 %, sərəncamda qalan 762 dollar

  • Gürcüstan: Orta maaş 822 dollar, vergi 20 %, sərəncamda qalan 657 dollar

  • Ermənistan: Orta maaş 771 dollar, vergi 20 %, sərəncamda qalan 616 dollar

Azərbaycanla müqayisə

Azərbaycanda hazırda orta aylıq əməkhaqqı 1094 manat (təxminən 643 dollar) təşkil edir. 2026-cı ildən tətbiq olunacaq 3 % vergi çıxıldıqda, işçinin əlində 623 dollar qalır.

Bu rəqəm, vergi dərəcəsi aşağı olsa belə, region ölkələri ilə müqayisədə daha aşağı real gəlir deməkdir.

MDB və Avropa ölkələrində maaşlar

Bir sıra ölkələrdə orta aylıq əməkhaqqı xeyli yüksəkdir:

  • Litva – 2750 dollar

  • Estoniya – 2366 dollar

  • Latviya – 1582 dollar

  • Moldova – 872 dollar

  • Belarus – 824 dollar

Avropada vergilər yüksək olsa da, maaşlar daha çoxdur. Eurostat məlumatına görə, Aİ-də orta aylıq əməkhaqqı 3317 avroya çatıb.

Ən yüksək maaşlar:

  • Lüksemburq — 6900 avro

  • Danimarka — 5964 avro

  • İrlandiya — 5088 avro

Ən aşağı maaşlı ölkələr belə Azərbaycanla müqayisədə daha yüksəkdir:

  • Bolqarıstan — 1282 avro

  • Yunanıstan — 1496 avro

  • Macarıstan — 1538 avro

Nəticə

Verginin 3 % olması nominal olaraq böyük güzəştdir, lakin orta əməkhaqqı aşağı qaldığından, işçilərin sərəncamında qalan real vəsait region və Avropa ilə müqayisədə yenə də geri qalır.

Oxundu: 10