Azərbaycan.media xəbər verir ki, ABŞ hökuməti ötən gün təxminən 100 iranlı miqrantı ölkədən deportasiya edib. Bu barədə “The New York Times” məlumat yayıb.
Deportasiya olunanlar arasında sığınacaq müraciətləri rədd edilmiş qadınlar, kişilər və ailələr olub. Onların bir hissəsi saxlanıldıqdan sonra könüllü şəkildə ölkəni tərk etməyə razılaşıb.
Luiziana ştatından havaya qalxan xüsusi reys Qətər üzərindən İrana yönəldilib. Bu, son illərdə İran vətəndaşlarına qarşı həyata keçirilən ən genişmiqyaslı deportasiya hesab olunur.
ABŞ uzun müddət diplomatik əlaqələrin olmaması və sənədləşmə çətinlikləri səbəbindən İran vətəndaşlarını deportasiya etməkdən çəkinirdi. Lakin bu dəfə proses Vaşinqton və Tehran arasında aparılan gizli danışıqlar nəticəsində mümkün olub.
İran Xarici İşlər Nazirliyi deportasiya olunan şəxslərin geri qaytarılmasını koordinasiya etdiyini açıqlayıb. Rəsmi Tehran bu addımı iki ölkə arasında nadir əməkdaşlıq nümunəsi kimi qiymətləndirib.
Media nümayəndələri isə deportasiya edilən şəxslərin İranda üzləşə biləcəkləri risklərə baxmayaraq, əməliyyatın həyata keçirildiyini vurğulayırlar.