Azərbaycan.media xəbər verir ki, Milli Hidrometeorologiya Xidmətinin məlumatına əsasən, sabah Bakıda və Abşeron yarımadasında hava şəraitinin dəyişkən buludlu olacağı, arabir tutulacağı və əsasən yağmursuz keçəcəyi proqnozlaşdırılır.
Bildirilib ki, mülayim cənub-qərb küləyi günün ikinci yarısında şimal-qərb küləyi ilə əvəz olunacaq. Havanın temperaturu gecə 10-13, gündüz isə 19-24 dərəcə isti olacaq. Atmosfer təzyiqinin 755 mm civə sütunundan 751 mm civə sütununa enəcəyi, nisbi rütubətin isə 60-70 faiz təşkil edəcəyi gözlənilir.
Regionlarda isə əsasən dağlıq və dağətəyi ərazilərdə hava şəraitinin arabir yağıntılı olacağı ehtimal olunur. Ayrı-ayrı yerlərdə yağıntının qısamüddətli intensivləşəcəyi, şimşək çaxacağı, dolu düşəcəyi, dağlıq ərazilərdə isə sulu qar müşahidə oluna biləcəyi qeyd edilib.
Havanın temperaturu rayonlarda gecə 8-11, gündüz 20-25 dərəcə isti, dağlıq ərazilərdə isə gecə 2-7, gündüz 13-18 dərəcə isti olacaq.
