Azərbaycan.media xəbər verir ki, Milli Hidrometeorologiya Xidmətinin APA-ya verdiyi məlumata əsasən, dekabrın 29-da Bakıda və Abşeron yarımadasında hava şəraiti dəyişkən buludlu olacaq, arabir tutulacaq və əsasən yağmursuz keçəcək. Mülayim cənub-qərb küləyi əsəcək.
Havanın temperaturu gecə saatlarında 1–3° isti, gündüz isə 6–9° isti təşkil edəcək. Atmosfer təzyiqi 750 mm civə sütunu səviyyəsində olacaq. Nisbi rütubət gecə 80–85 faiz, gündüz isə 60–65 faiz olacaq.
Azərbaycanın rayonlarında hava şəraitinin əsasən yağmursuz keçəcəyi gözlənilir. Lakin günün ikinci yarısından etibarən dağlıq ərazilərdən başlayaraq bəzi yerlərdə arabir yağıntı müşahidə olunacaq, qar yağacağı ehtimal edilir. Ayrı-ayrı ərazilərdə yağıntının intensivləşəcəyi proqnozlaşdırılır. Bəzi yerlərdə duman, qərb küləyinin isə arabir güclənəcəyi gözlənilir.
Rayonlarda havanın temperaturu gecə 2° şaxtadan 3°-dək isti, gündüz 5–9° isti olacaq. Dağlıq ərazilərdə gecə 5–10° şaxta, yüksək dağlıq ərazilərdə isə 10–15° şaxta qeydə alınacaq. Gündüz saatlarında dağlarda temperatur 1–6° şaxta təşkil edəcək.
Qeyd olunur ki, gecə və səhər saatlarında bəzi dağlıq ərazilərdə yolların buz bağlaması ehtimalı var.