Azərbaycan.media xəbər verir ki, Azərbaycan Respublikasının Prezidenti İlham Əliyev dekabrın 23-də Xankəndi şəhərində bir sıra mühüm təhsil və enerji obyektlərinin açılış mərasimində iştirak edib.
Dövlət başçısı əvvəlcə Kərkicahan qəsəbəsində 1 nömrəli tam orta məktəbin əsaslı təmirindən sonra açılışında iştirak edib. Elm və təhsil naziri Emin Əmrullayev Prezidentə görülmüş işlər barədə məlumat verib. Bildirilib ki, 624 şagird yerlik məktəbin binasında 17 sinif otağı, laboratoriyalar, STEAM, informatika, biologiya, kimya, fizika, texnologiya otaqları, hərbi hazırlıq, dərnək, məktəbəqədər hazırlıq otaqları, kitabxana, oxu, idman və akt zalları, yeməkxana şagird və müəllimlərin istifadəsinə veriləcək. Həyətyanı sahədə isə açıq idman meydançası yaradılıb.
Sonra Prezident İlham Əliyev Qarabağ Universitetinin Biznes və iqtisadiyyat fakültəsinin yeni tədris binasının açılışında iştirak edib. Dövlətimizin başçısına fakültədə yaradılmış şərait barədə məlumat verilib. Fakültədə hazırda 20 professor-müəllim, inzibati və texniki heyət fəaliyyət göstərir. Burada 505 tələbə bakalavriat səviyyəsində iqtisadiyyat, maliyyə, mühasibat uçotu, menecment, dövlət və bələdiyyə idarəetməsi, beynəlxalq ticarət və logistika, turizm işinin təşkili üzrə təhsil alır. Yeni binada 40 auditoriya, kompüter laboratoriyaları, kitabxana, oxu və akt zalları, iclas, inzibati və professor-müəllim otaqları mövcuddur. Bina müasir universitet konsepsiyasına uyğun inşa olunub və fakültənin elmi-pedaqoji potensialının gücləndirilməsinə imkan yaradır. Hazırda Qarabağ Universitetində 27 ixtisas üzrə 6 fakültədə 2154 tələbə təhsil alır.
Prezident İlham Əliyev həmçinin “AzərEnerji” ASC-nin 110/35/10 kV-luq “Xankəndi-1” elektrik yarımstansiyasının açılışında iştirak edib. “AzərEnerji” ASC-nin idarə heyətinin sədri Baba Rzayev dövlətimizin başçısına həyata keçirilmiş işlər barədə məlumat verib. Bildirilib ki, yarımstansiya işğaldan azad olunmuş ərazilərdə 110 kV-luq gərginlik sinfi üzrə tikilmiş ilk qapalı tipli obyekt olub və Xankəndi şəhəri, Ağdərə, Xocalı və Xocavənd rayonlarına dayanıqlı elektrik enerjisi təmin edəcək. Yarımstansiyada yüksək texnologiyalı Micro-SCADA sistemi quraşdırılıb, 1,8 km-lik yeraltı kabel və 11 km-lik yüksəkgərginlikli ötürmə xətti çəkilib. Bundan əlavə, Qarabağ və Şərqi Zəngəzurda 1000 km uzunluğunda dairəvi elektrik təchizatı sistemi yaradılıb, 12 yeni yarımstansiya zəncirvari şəkildə əlaqələndirilib və regionun enerji infrastrukturu modernləşdirilib.
Prezident İlham Əliyevə həmçinin ölkədə “Yaşıl enerjiyə keçid” meqalayihələri barədə məlumat verilib. Bunun çərçivəsində 500 kV-luq “Nəvahi” yarımstansiyası, “Şəfəq” Günəş Elektrik Stansiyası və Səngəçal terminalının elektrikləşdirilməsi layihələri tamamlanıb. Ölkədə bərpaolunan enerji mənbələrinin inteqrasiyası üçün Batareya Enerji Saxlanc sistemləri də qurulur.
Bu tədbirlər işğaldan azad olunmuş ərazilərdə təhsil və enerji infrastrukturunun modernləşdirilməsi, dayanıqlı inkişaf və yüksək keyfiyyətli xidmətlərin təmin edilməsi istiqamətində atılmış mühüm addımlar kimi qiymətləndirilir.