Azərbaycan.media xəbər verir ki, Rusiyanın Dağıstan bölgəsi yaxın aylarda enerji çatışmazlığı ilə üz-üzə qala bilər. Bu xəbər artıq rəsmi səviyyədə təsdiqlənib—ölkənin enerji sistemini tənzimləyən “Sistem operatoru”nun rəhbəri Fedor Opadçi Federal Antinhisar Xidmətinin tarif konfransında bu barədə açıq danışıb.
Opadçi bildirib ki, enerji defisiti xüsusilə Dağıstanın Kaspiy sahilində özünü göstərir. Onun sözlərinə görə, bölgədəki artım real istehlakdan deyil, kommersiya itkiləri və qeyri-qanuni qoşulmalarla bağlıdır:
“Bu, çətin regiondur. Artım rəqəmləri əsasən kommersiya itkiləri ilə formalaşır.”
Enerji mütəxəssisləri uzun illərdir Dağıstanın elektrik şəbəkəsindəki qeyri-leqal qoşulmalar və itkilər səbəbindən risk altında olduğunu vurğulayırdılar. İndi bu narahatlıq artıq sistem səviyyəsində də tanınıb—rəsmi dilə çevrilib.
Opadçi əlavə edib ki, oxşar enerji gərginliyi Sibirin bəzi bölgələrində də müşahidə olunur. Beləliklə, Rusiya enerji sistemindəki lokal çatlar artıq regional deyil, strateji miqyasda narahatlıq doğurur.
Azərbaycan.media