Bu gün Azərbaycan mədəniyyətinin, xüsusilə də televiziya və kino sənətinin parlaq səhifələrindən birini yazmış, Babayevlər nəslinin görkəmli nümayəndəsi, istedadlı rejissor Vasif Babayevin 85 illik yubileyidir. Bu nəslin – Arif, Vasif, Azər Babayevlərin – sənətə verdiyi töhfələr bütövlükdə bir estetik məktəb, bir yaradıcılıq fəlsəfəsi kimi dəyərləndirilə bilər. Vasif müəllim isə bu məktəbin zirvəsində dayanan, həm peşəkarlığı, həm də insani keyfiyyətləri ilə seçilən bir sənətkar kimi yaddaşlara həkk olunub.
Mənim audiovizual zövqümün, bilik və düşüncəmin formalaşmasında Vasif Babayevin rolu danılmazdır. Onun ekran dili, obrazlara yanaşması, dramaturji həssaslığı və estetik duyumu bir çoxlarımız üçün məktəb olub. Vasif müəllimin rejissor kimi yaratdığı hər bir iş – istər sənədli filmlər, istər televiziya tamaşaları – Azərbaycan tamaşaçısının yaddaşında silinməz izlər buraxıb. O, ekranı sadəcə görüntü vasitəsi kimi deyil, ruhun və zamanın aynası kimi dəyərləndirib.
Vasif Babayev təkcə böyük sənətkar deyil, həm də əziz dostumuz, TV tariximizin canlı əfsanəsidir. Onunla hər görüş, hər söhbət bir öyrənmə, bir ruhani zənginləşmə anıdır. Bu yubiley, sadəcə bir yaş göstəricisi deyil – bu, bir sənət ömrünün, bir mədəniyyət salnaməsinin təntənəsidir.
Əziz Vasif müəllim, Sizi 85 illik yubileyiniz münasibətilə ürəkdən təbrik edirəm. Sizin sənət yolunuz, insani duruşunuz və yaradıcılıq enerjiniz bizlərə ilham verir. 100-ə doğru inamla, sevgi ilə, sənətlə irəliləyin!
Hörmətlə və ehtiramla,
Əməkdar jurnalist, professor Qulu Məhərrəmli
Azərbaycan.media
