Azərbaycan.media xəbər verir ki, mütəxəssislər dəri elastikliyinin qorunmasında mühüm rol oynayan kollagenin istehsalını stimullaşdıran qidaları açıqlayıblar.
Kollagen dərinin əsas struktur komponentlərindən biridir. Lakin onun səviyyəsi 25 yaşdan etibarən tədricən azalmağa başlayır. Bu səbəbdən kollagen istehsalını qorumaq üçün gündəlik qidalanmada protein, omeqa-3 yağ turşuları və C vitamini ilə zəngin məhsullara üstünlük verilməsi tövsiyə olunur.
Əczaçılıq mütəxəssisi Abarquero Cerezo bildirib ki, kollagen daim parçalanır və yenidən sintez olunur. Onun sözlərinə görə, istehsal olunan kollagenin miqdarında və ya keyfiyyətində yaranan balanssızlıq, xüsusilə yaşlanma prosesində, müxtəlif dəyişikliklərə səbəb olur.
Mütəxəssislər xüsusilə qızılbalıq balığının istehlakını tövsiyə edirlər. Bundan əlavə, ət, süd məhsulları, qoz-fındıq və antioksidantlarla zəngin tərəvəzlər də kollagen sintezinin dəstəklənməsində mühüm rol oynayır.
Sitrus meyvələri, giləmeyvələr və brokoli kimi C vitamini ilə zəngin məhsullar kollagenin formalaşmasında iştirak edir və dərini vaxtından əvvəl qocalmadan qoruyur. Qidalanma ilə yanaşı, mütəxəssislər artıq şəkər və emal olunmuş qidalardan uzaq durmağı, eləcə də orqanizmin nəmlik səviyyəsini qorumağı tövsiyə edirlər.
