Azərbaycan.media xəbər verir ki, Beşinci Antalya Diplomatiya Forumu çərçivəsində Cənubi Qafqazda baş verən son proseslərin müzakirəyə çıxarılması regionun beynəlxalq gündəmdə xüsusi əhəmiyyət daşıdığını göstərir.
Bu fikirləri AZƏRTAC-a açıqlamasında Milli Məclisin deputatı Samir Vəliyev səsləndirib. O bildirib ki, qlobal sistemdə dərinləşən qeyri-müəyyənliklər, transformasiya prosesləri və müxtəlif regionlarda müşahidə olunan inkişaf meyilləri forumun əsas diqqət mərkəzindədir.
Deputat vurğulayıb ki, siyasi, ekoloji, iqtisadi və texnoloji istiqamətlər üzrə formalaşan əsas məsələlər müzakirələrin aparıcı xəttini təşkil edir. Bu çoxşaxəli yanaşma qlobal çağırışların daha dərindən təhlilinə, tərəflər arasında fikir mübadiləsinin genişlənməsinə və ortaq həll yollarının müəyyənləşdirilməsinə imkan yaradır.
Samir Vəliyev xatırladıb ki, 2021-ci ildən etibarən keçirilən Antalya Diplomatiya Forumu hər il dünyada aktual məsələlərin müzakirəsi üçün mühüm platformaya çevrilir. Onun sözlərinə görə, 2022-ci ildə keçirilən forumda Rusiya-Ukrayna müharibəsi geniş müzakirə olunub və tərəflər arasında görüş təşkil edilib. Məhz həmin çərçivədə münaqişənin həlli ilə bağlı “İstanbul prinsipləri”nin əsası qoyulub.
Deputat qeyd edib ki, müasir dövrdə qloballaşma daha mürəkkəb mərhələyə keçib. Müharibələr, sanksiyalar, enerji və logistika zəncirlərindəki qırılmalar beynəlxalq münasibətlərdə yeni boşluqlar yaradır. Bu boşluqların ya sərt güc, ya da alternativ diplomatik mexanizmlərlə doldurulduğunu deyən Vəliyev əlavə edib ki, artıq əsas sual “kim güclüdür” deyil, “kim daha effektiv əlaqələndirə bilir” məsələsidir.
Onun sözlərinə görə, Antalya Diplomatiya Forumu kimi platformalar paralel diplomatiya kanalları yaradır və rəsmi danışıqların çətinləşdiyi məqamlarda tərəflərə daha elastik mövqe sərgiləmək imkanı verir. Bu baxımdan belə forumların əhəmiyyəti qəbul edilən qərarlardan çox, yaratdığı imkanlarla ölçülür.
Deputat vurğulayıb ki, İlham Əliyev-in forumda iştirakı Azərbaycanın seçdiyi siyasi xəttin davamıdır. Bu xətt müxtəlif güc mərkəzləri ilə balanslı əməkdaşlığa əsaslanır və ölkənin həm regional, həm də qlobal miqyasda mövqeyini gücləndirir.
Eyni zamanda, o bildirib ki, forum Türkiyənin qlobal güc kimi mövqeyini daha da möhkəmləndirir. Rəcəb Tayyib Ərdoğan-ın son illərdə həyata keçirdiyi siyasət Ankaranı təkcə regional aktor deyil, həm də vasitəçi və təşəbbüskar güc kimi təqdim edir. Antalya platforması isə bu strategiyanın praktik təzahürü kimi çıxış edir.
