Azərbaycan.media xəbər verir ki, İspaniyanın Malaqa Universiteti alimləri tərəfindən aparılan və beynəlxalq elmi jurnalda dərc olunan araşdırma narın tərkibində olan “punikalin” adlı təbii birləşmənin xərçəng hüceyrələrinin inkişafını ləngitmək potensialına malik olduğunu göstərib.
Tədqiqatın nəticələrinə əsasən, bu maddə xüsusilə süd vəzi xərçənginin ən aqressiv formalarından biri hesab edilən “üçlü neqativ süd vəzi xərçəngi” üzərində diqqətəlayiq təsir göstərir. Qeyd olunur ki, bu xərçəng növü ümumi halların təxminən 10-15%-ni təşkil edir və hədəfli müalicələrə cavab vermədiyi üçün terapiya imkanları olduqca məhduddur. Əksər hallarda əsas müalicə üsulu kimi yalnız kimyaterapiya tətbiq edilir.
Araşdırmada vurğulanır ki, punikalin xərçəng hüceyrələrinin çoxalmasını zəiflədə, onların orqanizm daxilində yayılma riskini azalda və metastaz ehtimalını aşağı sala bilər. Bu xüsusiyyətlər xüsusilə aqressiv şiş növləri ilə mübarizədə mühüm əhəmiyyət daşıyır.
Bundan əlavə, məlum olub ki, sözügedən təbii birləşmə şişlərin inkişafı üçün vacib olan yeni qan damarlarının yaranmasını (angiogenez) məhdudlaşdıra bilər. Bu isə şişin “qidalanmasını” çətinləşdirərək onun böyüməsini ləngidə bilər.
Mütəxəssislər qeyd edirlər ki, əldə olunan nəticələr hələlik laboratoriya şəraitində aparılan tədqiqatlara əsaslanır və insanlar üzərində klinik sınaqlarla təsdiqlənməyib. Buna görə də punikalinin dərman kimi istifadəsi üçün daha geniş və dərin araşdırmalara ehtiyac var. Bununla belə, alimlər hesab edirlər ki, bu kimi təbii birləşmələr gələcəkdə xərçəng müalicəsində mühüm rol oynaya bilər.
