Azərbaycan.media xəbər verir ki, “Qafqazinfo” Cənubi Koreyanın Birgə Qərargah Rəislərinə istinadən “Yonhap” agentliyinin məlumatına əsasən xəbər yayıb. Bildirilir ki, Şimali Koreya səhər saatlarında Şərq Dənizinə (Yapon dənizi) naməlum raket buraxıb. Raketin tipi hələ müəyyən edilməyib.
Qeyd edilir ki, bir gün əvvəl də Pxenyan bölgəsindən naməlum raket buraxılmış, lakin bu buraxılış uğursuz olub və raket qısa müddət sonra yoxa çıxıb.
Son raket buraxılışları regiondakı artan gərginlik fonunda baş verir. Bu ilin əvvəlində iki Koreya arasında pilotsuz uçuş aparatları (PUA) ilə bağlı insidentlər münasibətləri daha da gərginləşdirib. Yanvarın 10-da Şimali Koreya Cənubi Koreyanı sərhəddə qəzaya uğrayan PUA vasitəsilə hava məkanını pozmaqda ittiham edib. Buna cavab olaraq, Cənubi Koreya Prezidenti Li Ce Myunq araşdırma aparılmasını tapşırıb və baş verənlərdən təəssüfləndiyini bildirib.
Eyni zamanda, Cənubi Koreyada prokurorluq üç nəfərə qarşı Şimali Koreyaya PUA göndərmək ittihamı irəli sürüb.
