Azərbaycan.media xəbər verir ki, Rusiyanın Novosibirsk vilayətində tanışını qətlə yetirməkdə təqsirli bilinən qadın barəsində ittihamedici hökm çıxarılıb.
Moşkovski rayon məhkəməsində Stansionno-Oyaşinski qəsəbə sakininə qarşı cinayət işinə baxılıb.
İstintaq və məhkəmə araşdırması zamanı müəyyən olunub ki, 2025-ci il martın 17-də təqsirləndirilən şəxs tanışının evində olarkən onunla mübahisə edib. Münaqişə zamanı qadın kişiyə çəkiclə çoxsaylı zərbələr endirib. Aldığı xəsarətlər nəticəsində zərərçəkən hadisə yerində ölüb.
Hadisədən sonra qadın mərhuma məxsus 25 min rublu ələ keçirib. Məhkəmənin hökmü ilə o, “qəsdən adam öldürmə” və “yaşayış sahəsinə qanunsuz daxil olmaqla törədilmiş oğurluq” maddələri üzrə təqsirli bilinib.
Cinayətlərin məcmusu üzrə təqsirləndirilən şəxsə 9 il 5 ay 10 gün müddətinə azadlıqdan məhrumetmə cəzası təyin olunub. O, cəzasını ümumi rejimli islah müəssisəsində çəkəcək.