Azərbaycan.media xəbər verir ki, ABŞ administrasiyası Ukrayna və Rusiyaya müharibəni yay aylarına qədər bitirmək üçün təzyiq göstərir. Lakin bu yanaşma prinsipial olaraq yeni sayılmır, çünki Donald Tramp administrasiyası daha əvvəl də oxşar son tarixlər irəli sürsə də, bu cəhdlər real nəticə verməyib.
Bu barədə “NBC News” xəbər yayıb. Bildirilir ki, vəzifəyə başladığı vaxtdan etibarən Donald Tramp beynəlxalq münaqişələrin həllində son tarixləri əsas alət kimi istifadə edib.
Məsələn, Tramp HƏMAS-a Qəzzada ABŞ-ın dəstəklədiyi sülh təkliflərinə cavab verməsi üçün konkret müddət müəyyən edib, həmçinin yeni nüvə sazişi ilə bağlı İrana iki aylıq möhlət tanıyıb. O, eyni zamanda Rusiya–Ukrayna müharibəsinin bitməsi üçün də bir neçə mümkün son tarix irəli sürüb.
Qeyd olunub ki, Trampın prezidentliyinin ilk həftələrində komandası Ukraynadakı müharibəni 24 saat ərzində bitirmək kimi kampaniya dövründə səsləndirilən iddialı vədlərdən geri çəkilərək, andiçmə mərasimindən sonra 100 gün ərzində – yəni 2025-ci ilin mayına qədər sülh sazişinin mümkünlüyündən danışmağa başlayıb.
Məlumatda vurğulanır ki, həm Ukrayna, həm də Rusiya Trampın irəli sürdüyü bu son tarixləri ardıcıl şəkildə görməzdən gəlir və bu yanaşma indiyədək praktik nəticə verməyib.