Azərbaycan.media xəbər verir ki, qatıq mayası olmadan qatıq hazırlamaq müəyyən hallarda mümkün olsa da, bu proses istifadə olunan kərə yağının növündən asılıdır.
Məlumata görə, qatıq süddəki laktozanın laktik turşu bakteriyaları vasitəsilə fermentasiyası nəticəsində yaranır. Klassik qatıq mayası da məhz bu bakteriyaları ehtiva edir. Kərə yağı isə əsasən yağdan ibarət olduğu üçün adi şəraitdə bu bakteriyaları aktiv şəkildə saxlamır və buna görə də standart maya hesab edilmir.
Bununla belə, əgər kərə yağı qatıqdan və ya ayrandan hazırlanıbsa (yəni nehrə yağıdırsa), onun tərkibində az miqdarda canlı bakteriyalar qala bilər. Belə yağ uyğun temperatur şəraitində südü mayalaya bilir. Xüsusilə duzsuz və kənd üsulu ilə hazırlanmış kərə yağından istifadə edildikdə qatığın alınma ehtimalı artır.
Mütəxəssislər bu üsulun uğurlu alınması üçün bir sıra vacib məqamları da açıqlayır. Belə ki, marketlərdə satılan və qaymaqdan hazırlanan kərə yağları bu proses üçün uyğun deyil. Südün temperaturu təxminən 44–46°C olmalı, nə çox isti, nə də soyuq olmamalıdır. Təzə kənd südü ilə nəticənin daha uğurlu olduğu bildirilir.
Qeyd olunur ki, bu üsulla qatıq hazırlamaq klassik mayalama ilə müqayisədə daha uzun vaxt aparır – adətən 5–9 saat, bəzi hallarda isə 8–10 saat tələb olunur. Həmçinin kərə yağını birbaşa südə əlavə etmək əvəzinə, əvvəlcə az miqdarda ilıq süddə əridib qarışdırmaq daha yaxşı nəticə verir.
Sonda vurğulanır ki, kərə yağı ilə qatıq mayalamaq mümkün olsa da, bu üsul hər zaman stabil nəticə vermir və daha çox alternativ variant kimi dəyərləndirilir
