Tərəziyə
Hələ bir fikrini tərəzidə çək,
həsrəti, xiffəti vur tərəziyə…
Kini, küdurəti, qərəzi də çək,
gəlirmi heç abır, ar tərəziyə…
Yuva ki deyildir qurduğun xəyal,
qan ilə sovuşur hər cəngi-cidal…
Haqsızlıq üzünə kim oxudur val,
kimdi hiylə edən, gör, tərəziyə…
İşində çox ləngsən, sözündə yeyin,
varsa da söyləmə dərdin, gileyin…
Pərsəngi qoy olsun əl təmizliyin;
bir vicdanına bax, bir tərəziyə…
Mənbə: Azərbaycan.media