Azərbaycan.media xəbər verir ki, əgər zəiflik, tez yorulmaq, üşümək, baş ağrısı kimi şikayətləriniz varsa, anemiya (qan azlığı) problemi ilə üzləşə bilərsiniz. Mütəxəssislər anemiyanın qırmızı qan hüceyrələrinin sayının və ya hemoqlobin miqdarının azalması ilə xarakterizə olunduğunu bildirir və bunun üç əsas səbəbi olduğunu vurğulayır:
1. Qan itkisi
2. Qırmızı qan hüceyrəsi (eritrosit) istehsalının pozulması
3. Qırmızı qan hüceyrələrinin məhvinin artması
Həkimlər deyir ki, qan azlığı şübhəsi olduqda ilk addım xəstəliyin həqiqətən olub-olmadığını müəyyən etməkdir. Bunun üçün qan analizləri mütləqdir. Anemiyanın növünü müəyyən etmək də çox vacibdir, çünki səbəbin dəqiq təyin edilməsi üçün qırmızı qan hüceyrələrinin böyük və ya kiçik olub-olmaması önəmlidir.
Hamiləlik dövründə yaranan anemiyaların 90%-i dəmir çatışmazlığından qaynaqlanır. Bundan başqa fol turşusu və B12 çatışmazlığı, nadir hallarda isə talassemiya (Aralıq dənizi anemiyası) səbəbi ilə anemiya yaranır.
Böyüklərdə isə dəmir çatışmazlığı daha çox xroniki qan itkisindən irəli gəlir. Xroniki qanaxmanın səbəbləri arasında mədə xorası, hiatal yırtıq, varikoz damarları, yoğun bağırsaq polipləri, kolit, hemoroid, bağırsaq parazitləri, sidik yollarında qanaxma, davamlı aspirin istifadəsi və ağciyər qanaxmaları yer alır.
Vegetarianlar anemiyadan qorunmaq üçün həkimlə məsləhətləşməli və pəhriz proqramına riayət etməlidirlər. Əgər həkim dəmir preparatlarının istifadəsini tövsiyə edirsə, onları yüngül səhər yeməyindən 1 saat sonra qəbul etmək lazımdır. Süd məhsulları ilə birlikdə qəbul edildikdə dəmirin udulması azalır.
Qeyd olunur ki, aç qarına dəmir preparatları bəzi mədə-bağırsaq narahatlıqlarına səbəb ola bilər, məsələn, qəbizlik və nəcisin rənginin qaralması. Bu hallarda dərmanı dayandırmadan əvvəl həkimə müraciət etmək vacibdir.
Mütəxəssislər xəbərdarlıq edir ki, anemiyanın müalicəsi gecikdirilərsə, ciddi sağlamlıq problemləri yarana bilər. Bunlara qavrama və öyrənmə funksiyalarının azalması, diqqətin dağılması, yorğunluq və apatiya daxildir.