Azərbaycan.media xəbər verir ki, dəvə və lama antikorlarından əldə edilən miniatür zülallar — “nanokorlar” Alzheimer xəstəliyi və şizofreniya kimi beyin pozğunluqlarının müalicəsində yeni imkanlar açır.
Bu barədə Fransanın Milli Elmi Tədqiqat Mərkəzinin alimləri məlumat yayıb. Araşdırmanın nəticələri Trends in Pharmacological Sciences jurnalında dərc olunub.
Tədqiqatçılara görə, bu heyvanlardan alınan “nanokor” adlanan antikorlar insan immun sistemindəki iri Y formalı molekullardan təxminən on dəfə kiçik olsa da, virusları və toksinləri tanımaq və zərərsizləşdirmək qabiliyyətini saxlayır. Kiçik ölçülərinə görə, onlar bədənin standart antikorların çata bilmədiyi dərin toxumalara nüfuz edə bilirlər.
Dəvələr, lamalar və alpakalar təbii olaraq bu cür miniatür antikorlar istehsal edən nadir məməlilər sırasına daxildir. Laboratoriya şəraitində alimlər bu molekulları daha sabit və kompakt formaya salıblar. Artıq sübut olunub ki, nanokorlar qrip, COVID-19 və HİV viruslarına qarşı effektiv qoruma təmin edə bilir.
Əvvəllər onların beyin xəstəliklərində istifadəsi mümkün sayılmırdı, çünki böyrəklər bu molekulları sürətlə qan dövranından çıxarır, qan-beyin baryeri isə iri hissəciklərin keçməsinə imkan vermirdi. Lakin son təcrübələr göstərib ki, modifikasiya olunmuş nanokorlar bu baryeri aşaraq zədələnmiş beyin sahələrinə çata bilir. Heyvanlarda aparılan sınaqlarda onlar Alzheimer xəstəliyinin əsas göstəriciləri olan tau zülallarına və beta-amiloid birləşmələrinə uğurla bağlanıblar.
Alimlərin fikrincə, nanokorlar həm klassik antikorların, həm də kiçik molekullu dərmanların üstünlüklərini birləşdirən yeni bir dərman sinfinin əsasını qoya bilər. Bununla belə, insanlarda istifadəyə keçid üçün onların sabitliyi və təhlükəsizliyi hələ əlavə tədqiqatlarla təsdiqlənməlidir.