Azərbaycan.media xəbər verir ki, gecə yuxuya getməkdə çətinlik çəkən insanların problemi bəzən mətbəxlə bağlı ola bilər. “The Journal of the National Sleep Foundation” jurnalında dərc edilən araşdırmaya görə, hər gün meyvə, tərəvəz və tam taxıl məhsulları yeyən insanların yuxu keyfiyyəti növbəti gecə 16 faiz yaxşılaşır. Bu fərq artıq bir günlük düzgün qidalanmadan sonra hiss olunur.
Tədqiqatçılar bildiriblər ki, meyvə və tərəvəzlər bədəni vitamin, mineral və antioksidantlarla təmin edir, sinir sistemini sakitləşdirir və orqanizmin ümumi balansını qoruyur. Gündə beş porsiya meyvə-tərəvəz qəbulu yuxunun daha dərin və fasiləsiz olmasına şərait yaradır.
Mütəxəssislərin sözlərinə görə, maqnezium və kalium kimi minerallar da rahat yuxu üçün mühüm rol oynayır. Maqnezium əzələlərin boşalmasına, kalium isə bədəndə maye balansının tənzimlənməsinə kömək edir. Bu minerallarla zəngin qidalar sırasında ispanaq, banan, avokado, yulaf və badam xüsusi yer tutur.
Həkimlər həmçinin gün ərzində kifayət qədər su içməyin vacibliyini vurğulayırlar. Bəzən dərin və rahat yuxu üçün sadəcə bir qab salat və bir stəkan su kifayət edir.