“525-ci qəzet”in baş redaktoru, Azərbaycan Yazıçılar Birliyinin sədr müavini Rəşad Məcidin paylaşdığı fikirlər həm həyatın, həm sənətin, həm də insan xarakterinin dərin qatlarını işıqlandırır. Onun yazdıqları bir tərəfdən müşahidə ustalığı, digər tərəfdən isə illərin gətirdiyi həyat təcrübəsinin təzahürüdür.
Rəşad Məcid sevgi və əzmlə işləyərək uğur qazanmağın nümunəsini Qurban Qurbanovun timsalında görür, təvazökarlığı və peşəkarlığı həyat düsturu kimi təqdim edir. O yazır ki, kini körükləməyə sərf olunan enerjini pozitiv istiqamətə yönəltmək insanı və onun ətrafını dəyişə bilər.
Məcidin fikrincə, yerinə düşən sözü tapmaq böyük səadətdir, sənət adamlarına hörmət göstərmək isə insanın özünə hörmət qazandırır. O, həm də diqqət mərkəzində olmağa aludə olmağın, sakitliyə çəkilə bilməməyin təhlükəli bir vərdiş olduğunu vurğulayır: bu, özünəgüvəni azaldır, depressiyaya gətirib çıxarır.
Yazıçı qeyd edir ki, insanın əsl xarakteri gərgin anlarda üzə çıxır, yazmaq isə insanı sakitləşdirir, terapiya rolunu oynayır.
Sosial mediaya toxunan müəllif bu mühitin həm faydalı, həm də zərərli tərəflərini xatırladır: məsuliyyətsiz, tərbiyəsiz və düşüncəsiz insanların yaydığı çirkab cəmiyyəti zəhərləyir.
Rəşad Məcid harınlıq, empati çatışmazlığı və başqalarının həyatına yuxarıdan baxmağı mənəvi cəzası olan hallar kimi dəyərləndirir. O, həmçinin sosial şəbəkələrin yaratdığı xaotik informasiya axınından bəhs edərək, ağıllı fikirlərin çox səslənməsinin bədniyyətləri susduracağını vurğulayır.
Kitab Sərgisi ilə bağlı təəssüratlarında Rəşad Məcid UNEC tələbələrinin savadına və özgüvəninə heyranlığını bildirir, bu gəncləri Zəfər ruhuna layiq nəsil adlandırır. O, həmçinin gənc yazıçı və naşirlərlə görüşlərini, oxuduğu kitabları təhlil edərək, Azərbaycan ədəbiyyatında təfəkkürün, düşüncənin və mənəvi zənginliyin yaşadığını nümayiş etdirir.
Rəşad Məcidin fikirləri arasında insanın daxili dünyası, müəllim obrazına hörmət, paxıllığın dağıdıcı təsiri, yadda qalan şəkillərin xoş enerji daşıması kimi mövzular da yer alır.
Müəllifin yazısında vətənpərvərlik və insani dəyərlər xüsusi vurğulanır. Şuşalı yeniyetmə Məcid Məmmədovun Xalq artisti Ramiz Quliyevin vida mərasiminə gəlməsi barədə danışarkən o yazır:
“Yüksək insani keyfiyyətlər dünyanın sabahını qoruyacaq əsas amildir.”
Sonda isə yazıçı sadə, amma dərin bir qənaətə gəlir:
“Vəzifə bəzilərinin düşüklük və səyliyini pərdələyirmiş.
Azərbaycan.media