Azərbaycan.media xəbər verir ki, Dövlət Tibbi-Sosial Ekspertiza və Reabilitasiya Agentliyi istehsalatda baş verən bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarının qiymətləndirilməsi prosesində mühüm yeniliklərə imza atır.
Agentliyin İdarə Heyətinin sədri Ramin Rzayevin Milli Məclisin Əmək və sosial siyasət komitəsinin iclasında verdiyi məlumata görə, əgər göndərişlər əsasında səbəb-əlaqə qismində istehsal qəzası bədbəxt hadisə kimi qeyd olunurdusa, qanunvericiliyin tələb etdiyi sənədlər toplanaraq Tibbi-Sosial Ekspertiza Komissiyasının həkim ekspertləri tərəfindən 10 gün ərzində praktik qaydada əlillik təyinatı aparılırdı.
Bu təyinat nəticəsində vətəndaşın əlillik statusu sistem üzərindən təsdiqlənir və səbəb kimi istehsal qəzası göstərilərək müvafiq məlumatlar iş yerinə ötürülür. Əlilliyin müəyyən edilməsi meyarlarına əsasən, orqanizmin funksiyasının pozulma dərəcəsi 30%-dən yuxarı olduqda vətəndaşa əlillik təyin edilir. Lakin xəsarət dərəcəsi 30%-dən aşağı olduqda, bu halların necə tənzimlənəcəyi qanunvericilikdə dəqiq şəkildə göstərilməmişdi.
Bu hüquqi boşluğun aradan qaldırılması məqsədilə yeni qaydaların hazırlanması zərurəti ortaya çıxıb. Ramin Rzayevin sözlərinə görə, bu sahədəki qayda əksikliyi müəyyən olunaraq, yeni hüquqi çərçivə formalaşdırılıb.
Hazırda müzakirədə olan “İstehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta haqqında” qanun layihəsinə təklif edilən dəyişikliklərə əsasən, sığorta hadisəsi nəticəsində zərər çəkmiş şəxsin peşə əmək qabiliyyətinin itirilməsi dərəcəsinin müəyyən edilməsi üçün yeni qaydalar tətbiq olunacaq. Qanun layihəsi qəbul edildikdən sonra bu qaydalar hüquqi qüvvəyə minəcək və daha şəffaf, ədalətli qiymətləndirmə mexanizmi təmin olunacaq.
