Dünən “Həmas” və İsrail arasında əldə olunan razılaşma, hər nə qədər müvəqqəti və kövrək olsa da, təqdirəlayiq bir addımdır. Bu razılaşma, ən azı hər iki tərəfdən günahsız insanların həyatının xilas olunması baxımından mühüm əhəmiyyət daşıyır. Müharibənin ən acı tərəfi, məhz mülki insanların, qadınların, uşaqların, yaşlıların həyatını itirməsidir. Bu razılaşma, həmin acıların bir müddət də olsa səngiməsinə ümid verir.
Lakin Qərb analitiklərinin bu razılaşmaya münasibəti ehtiyatlı və skeptikdir. Onların fikrincə, “Həmas”ın ideoloji mahiyyəti və strateji məqsədləri bu cür razılaşmaların uzunmüddətli sülhə çevrilməsinə imkan vermir. Təşkilatın əsas ideoloji xətti İsrailin mövcudluğunu qəbul etməmək və onu siyasi xəritədən silmək üzərində qurulub. Bu isə, istənilən razılaşmanın davamlılığını sual altına alır.
Bununla belə, tarix bizə göstərib ki, ən sərt ideologiyalar belə zamanla dəyişə, transformasiya ola bilər. Əgər bu razılaşma, tərəflər arasında humanitar koridorların açılmasına, əsirlərin dəyişdirilməsinə, yaralıların müalicəsinə və mülki əhalinin təhlükəsizliyinə xidmət edərsə, bu, regionda yeni bir dialoq mərhələsinin başlanğıcı ola bilər.
Yaxın Şərqdə sülh, yalnız silahların susması ilə deyil, tərəflərin bir-birini insan olaraq tanıması və qəbul etməsi ilə mümkündür. Bu razılaşma, əgər doğru istiqamətdə inkişaf etdirilərsə, sülhün kövrək nəfəsini gücləndirə bilər.
Mənbə: Azərbaycan.media