Azərbaycan.media xəbər verir ki, 24, 25 və 26 oktyabr tarixlərində, saat 19:00-da Azərbaycan Dövlət Akademik Musiqili Teatrının səhnəsində unudulmaz bir premyera baş tutacaq: tanınmış rejissor Ələkbər Tağızadənin librettosu və quruluşunda ərsəyə gələn “Sən kralsan” tamaşası tamaşaçılarla görüşəcək.
Bu müzikl XX əsrin əfsanəvi amerikalı musiqiçisi və aktyoru, “rok-n-rollun kralı” Elvis Preslinin ölməz əsərləri əsasında hazırlanıb. Səhnə əsəri ulduzun keşməkeşli həyat yolunu, ruhunun yüksəliş və enişlərini obrazlı və musiqili dillə izah edir — sanki hər nota onun taleyindən bir parça daşıyır.
Tamaşanın musiqi rəhbəri və quruluşçu dirijoru Cavad Tağızadədir. Baletmeyster Kamilə Əliyeva, quruluşçu rəssam Vüsal Rəhim, dirijor Səməd Süleymanlı, konsertmeyster Prezident təqaüdçüsü Kamil Həsənov, işıq rəssamı Rafael Vaqifoğlu, rejissor assistentləri Tamilla Aslanova və Polina Fyodorova bu mərasimvari səhnə işinin ruhunu formalaşdıran yaradıcı heyətdir.
Səhnədə isə parlaq adlar bir araya gəlir: Əməkdar artist İlham Nəzərov, Prezident təqaüdçüsü Atilla Məmmədov, Prezident mükafatçısı Mehriban Zaliyeva, aktyorlar Rauf Babayev, Leonid Klets, Olqa Georgieva, Aydan Həsənova və Sübhan Rüstəmova tamaşaya həyat verirlər.
Bu premyera yalnız bir teatr hadisəsi deyil — musiqi, xatirə və ruhun qovuşduğu bir mərasimdir. “Sən kralsan” — səhnədə bir ulduzun yenidən doğuluşudur.
Fuad Biləsuvarlı
Azərbaycan.media