Azərbaycan.media xəbər verir ki, oktyabrın 1-də Bakının Nərimanov rayonunda yerləşən yeni istirahət məkanının rəsmi açılışı baş tutdu. Açılış mərasimində Azərbaycan Respublikasının Prezidenti İlham Əliyev və birinci xanım Mehriban Əliyeva iştirak ediblər.
Yeni park Əhməd bəy Ağaoğlu, Təbriz və Tələt Şıxəliyev küçələrinin kəsişməsində, İtaliya-Azərbaycan Universitetinin yaxınlığında salınıb. 3,5 hektar ərazini əhatə edən bu yaşıllıq zonası şəhər sakinləri üçün həm rahat istirahət, həm də aktiv həyat tərzi üçün ideal şərait yaradır.
Parkda ziyarətçilər üçün söhbətgahlar, amfiteatr, tennis meydançası, uşaqlar üçün əyləncə zonaları və müasir işıqlandırma sistemi qurulub. Hər yaş qrupundan olan insanlar burada istirahət edə, idmanla məşğul ola və təbiətin qoynunda vaxt keçirə bilərlər.
Son illərdə paytaxtda yaşıllıq sahələrinin genişləndirilməsi və istirahət zonalarının müasirləşdirilməsi şəhərin simasını tamamilə dəyişib. Yeni parklar təkcə estetik baxımdan deyil, həm də ekoloji mühitin yaxşılaşdırılması baxımından mühüm rol oynayır.
Bu park Bakının “yaşıl xəritəsi”nə əlavə olunmuş daha bir dəyərli məkan kimi artıq şəhər əhalisinin və turistlərin ixtiyarındadır. İstirahət, əyləncə və sağlam həyat tərzini bir araya gətirən bu məkan, paytaxtın dinamik inkişafının bariz nümunəsidir.
Azərbaycan.media
.